miðvikudagur, desember 25, 2002

Hangikjöt, laufabrauð, egils appelsín, súkkulaði, úfffffff, ég er búin að borða allt of mikið. Jólin eru frábær tími því það er svo gott að vera heima hjá sér og gera mikið af því sem maður gerir sjaldan. T.d. sofa mikið, éta mikið og lesa bækur sem maður les ekki nema um jólin. Sendi ykkur jóla kveðjur, skotta rotta.

föstudagur, desember 20, 2002

Fimm ára dóttir vinar míns sagði þetta við mig í gærkveldi:" Veistu Björk það eru bara fimm dagar til jóla". Ha, hver andskotinn!!! hugsaði ég en sagði við hana"Já ég veit það og ég get ekki beðið alveg eins og þú"
Klukkan 1630 byrjar jólafríið. Syfjan er rosaleg á morgnana en ekki í morgun því það var ekki rigning, bara smá frost í nótt og það hefði verið geggjað að sofa úti í garði í nótt. Illugaskotta á ekkert rúm lengur því hún seldi það meðleigjanda sínum, því Illugaskottu leiðist það hræðilega að þurfa alltaf að flytja þetta bévítans rúm með sér hvert sem hún er að flytja, þannig að nú á hún bara hengirúm. Í kvöld er jólaglögg landvarða, nenni ekki því ég er félagsskítur þessa dagana, en mun fara í jólaglögg Umhverfisstofnunar sem verður í dag, kökur og með því ......

Át óhollasta morgunverð í heimi áðan, kóka kóla og kalda pizzu, en samt besti morgunverður í heiminum að mínu mati. Kvíður fyir prófinu veit varla hvað maður á að kunna í þessari vistfræði en mun mæta annað er ekki hægt..

fimmtudagur, desember 19, 2002

Trén eru ekki bara farin að bruma í Reykjavík, þau eru farin að blómstra!!!!! Runni einn sem stendur við anddyri Tæknigarðs þar sem ég á heima þessa dagana, hann sko runninn er farin að blómstra, það eru komin græn blöð út úr honum..... þetta var nú bara eftir, því veðrið hér á suðurlandinu er eins og á vorin, það er vorlykt í lofti og ekki að undra þótt plöntur ruglist í árstíðum ekki frekar en menn. Ef ég væri að skrýða út úr helli og búin að sofa í 3 mánuði þá myndi ég halda að það væri maí, alveg eins og runninn fyrir utan Tæknigarð. En samkvæmt dagatalinu þá er desember og jólin eru í næstu viku.Ég á eftir að flytja og pakka og kaupa jólagjafir og koma mér norður í afslöppun.....Illugaskotta er farin að lesa heldur seint í dag. 1330 :).

miðvikudagur, desember 18, 2002

Hvenær nemur tegund land og hvenær ekki? Þetta er svo leiðinlegt, er annars ekki að nenna að skrifa þetta. Úfff stress með það að það er stafsetningar villa í auglýsingar draslinu sem er fyrir sólstöðuhátíðina Fólk og fjöll og prentsmiðjan bíður spennt eftir breytingunni frá hönnuðinum sem er týndur úti í bæ og veit ekkert að það er villa í plakatinu, andskotinn sjálfur.....er búin að leita að henni út um allt.

Skoðaði hús í gær ásamt vini mínum við leynivatnið flotta, en húsið var að springa af raka og vibbaleg fúkalykt í því, En sá ótrúlega möguleika í því að búa þar, sérstaklega með það í huga að geta sofið úti í garði og æft mig á sjókajak bróður míns sem rykfellur í geymslu hér í Reykjavík.....get ekki beðið eftir því að drekkja mér í víni og gleði eftir þessi próf, og skunda norður til þess að skera út í laufabrauð og taka á móti jólunum.

mánudagur, desember 16, 2002

Nú er ég farin að telja dagana, fer sem sagt norður á mánudaginn í næstu viku!!! Og það er rigning,,,,sem betur fer segi ég nú bara :). Fór í Smáralindina í gær og það var hræðilegt, svo þungt loft og ótrúlega mikið af stressuðu fólki sem var að leita að einhverju sem það vissi ekki hvað var eða hvar það þetta væri að finna, en ég vissi að hverju ég var að leita en nennti ekki að skoða það eða máta þegar ég fann það, æddi bara út og fór heim til ömmu, þar sem alltaf er hægt að fá besta kaffi á landinu og besta ristaða brauð landsins. Við spjölluðum um það hvað fréttirnar væru nú alltaf leiðinlegar, það eru eiginlega aldrei skemmtilegar fréttir, bara leiðindi, rifrildi, morð, slys, náttúruhamfarir og önnur ömurleg heit,,,,,,,ég vil hafa sérstakan fréttatíma þar sem unnið er í því að birta jákvæðar, uppbyggilegar og skemmtilegar fréttir. Fannst forsíðan á Mogganum í gær, nánar tiltekið sunnudagsmogganum ömurleg, þar voru menn og vinnuvélar að grafa sig út og suður í kringum Dimmugljúfur...ekki jákvæð frétt en þetta er jákvæð frétt fyrir Frikka Sófa.


Sá er árla rís verður margs vís Þetta er margsannað í mínu lífi en núna í desember er ég ekki sú sem árla rís og verð þess vegna ekki margs vís þessa dagana.



Ps, foreldrar mínir fjárfestu í íslenskum fiðurfénaði í sumar, og viti menn fyrir nokkrum dögum síðan steig haninn inn í heim hanans, því allt í einu sagði hún móðir mín mér að hann væri byrjaður að gala!!! ég segi nú bara greyið hænurnar, fá engan frið fyrir þessu hana ræksni sem vill æfa raddböndinn mjög snemma á morgnana og svo eru hanar víst einnig kynóðir sem er enn þá verra ef þú ert hæna sem ert ekki í stuði en verður bara að lúta þínum hana sem fær það sem hann vill þegar honum sýnist.

Hér í Reykjavík eru seld egg sem eru sögð vera frá hamingjusömum hænum. Afhverju eru þær sagðar vera hamingjusamar? Jú, það er vegna þess að þær geta valsað út úr húsinu sínum út á hlað og kroppað þar orma og korn, og annað þær eru með hana sér við hlið sem galar ömurlega snemma á morgnana og er líka ótrúlegt kyntröll!!!!! Hvað haldið þið?

sunnudagur, desember 15, 2002

Læt veðrið hafa of mikil áhrif á mig, þessi rigning er yfirþyrmandi leiðinleg.

Langaði að segja ykkur frá því að í fyrradag var ég í sundi og vildi vera í friði, hitti ég þá ekki leiðinlegasta New York búa heimsins sem varð að tala og segja mér frá því hvar hann hefði nú stigið sínum ljótu fótum niður á jarðkringluna og að hann væri nú ekki alveg U.S.A búi því hann hefði nú verið alinn upp í Barcelona. Hummmm hvað eru Bandaríkjamenn að hugsa!!! Þeir þurfa alltaf að koma því að hvað þeir séu nú veraldarvanir, og sérstaklega þurfa þeir að koma því að ef þeir hafa nú ekki alveg búið í Bandaríkjunum alla sína lúsar ævi. Hann talaði og talaði og ég varð fúlari og fúlari þar sem hann var að trufla þagnarstund í pottinum í Vesturbæjarlauginni, en af því ég er svo óþolandi almennileg gella þá bara leyfði ég honum að mala á meðan ég hugsaði um það hvernig ég myndi koma honum fyrir kattarnef.

Það sem leiðinlega Bandaríkjamanninum fannst um Ísland:> Honum fannst fólkið ótrúlega almennilegt, honum fannst fáranlega fyndið hvað lítið væri um atvinnuleysi, að maður gæti bara gengið um göturnar án þess að vera í hættu að verða drepinn, honum fannst tungumálið okkar heillandi og áhugavert, honum fannst ótrúlega fyndið að það væri hægt að ganga upp að dyrum Herra Ólafs Ragnars Grímssonar og bara banka! honum fannst sundlaugarnar vera frábærar og hann langar til að flytja hingað og honum fannst margt annað en ég bara man það ekki.

laugardagur, desember 14, 2002

Fríða frábæra kemur í dag frá Danmörku og ég/Illugaskotta get ekki beðið eftir að hitta hana til þess að fíflast með henni fram til 1. janúar en þá fer hún aftur til Baunalandsins flata.

Ég var annars í morgun að skoða listaverk og tóftir við Dalland með Guðjóni vini mínum og henni Þórdísi, sem langar til þess að láta endurbyggja tóftirnar að hálfu, þetta eru tvö fjárhús sem liggja samsíða og fyrir aftan þau var hlaða. Við skokkuðum um landareignina hennar Þórdísar í morgun á meðan rigningin frábæra bleytti í okkur og vindurinn sem kemur frá jötninum Hræsvelgi, þeytti okkur til og frá. Margt viturlegt og ekki viturlegt var rætt í morgun þar sem við sátum við arininn sem logaði glatt í heima hjá Þórdísi, drukkum kaffi og átum Þingeyjinga ( Loftkökur). Draugar sveimuðu um, Íslendingasögur báru á góma og drekar sveimuðu yfir höfðunum á okkur. Skoðuðum eldgamla notaða tréklossa og þyngsta borð sem ég hef á ævinni séð, 500 kíló. Jeph gott fólk.

Skemmtið ykkur í rigningunni ef þið eruð á suðurlandi. Kveðja frá Illugaskottu.

föstudagur, desember 13, 2002

Góðann daginn gott fólk!!!!

dæs,,,jæja Illugaskotta er í góðu skapi í dag þótt það sé rigning og mjög dimmt úti, því það er föstudagurinn 13. og það gæti eitthvað spennandi gerst. Á eftir að fara til tannlæknis áður en árið er búið og það er eitt það hræðilegasta sem Illugaskotta gerir en það er að gapa framan í einhvern tannlækni og leyfa honum bora og hamast og MEIÐA hana!!! En nú er þetta orðið illbærilegt þetta ástand, og nú verður Illugaskotta að taka sér tak, hummm taka sér tak, hvað þýðir það eiginlega? Taka í tak? Hvaða tak er þetta eiginlega? En skiptir ekki máli, koma sér að efninu og drífa hlutina af. Skiptir öllu að drífa hlutina af.

Iðunn vinkona og ég vorum að drekkja okkur í bókaflóðinu í Mál og Menningu í gærkveldi, þá var Iðunn gripin höndum af ljósmyndara og blaðamanni. Í Morgunblaðinu í dag er mynd af Iðunni þar sem hún er að garfa í bókum og einnig er flott viðtal við hana, það er ekki að spyrja af því maður má ekkert fara eða gera og þá er maður komin í blöðin á Íslandi, FRÁBÆRT LAND ÉG ER AÐ SEGJA ÞAÐ!!!

Rímur og rapp er það sem á að senda til útlanda, besti diskurinn á markaðinum í dag.

Annars er nú svoldið montin, ánægð og stollt í dag. En bókin mín, Furðudýr í íslenskum þjóðsögum var í Kastljósi í gærkveldi og fékk alveg glimmrandi góða dóma hjá henni Úlfhildi Dagsdóttur, ég var farin að svitna í lófunum, naga á mér neglurnar, hnén og táneglurnar áður en hún fór að tala um mína bók, 4 bækur á undan minni sem var seinust í umfjölluninni. Með þessum orðum kláraði Úlfhildur umfjöllunina:
"Ég óska öllum landsmönnum nær og fjær furðudýra". Vá!!! þetta var frábært. En nú er það enn og aftur vistfræðin, fjölbreytileiki tegunda er fyrir öllu á jörðinni okkar.
.

fimmtudagur, desember 12, 2002

Jæja komið kvöld, og það er ekki frost, óþolandi þessi rigning. Mig langar í jólasnjó eins og í Kóka kóla auglýsingunum......
NENNI EKKI AÐ LÆRA,,,,,,,,,,LANGAR AÐ FARA Á HESTBAK, moka skít og tala við hrossinn....humm þau segja ekki neitt, hugsa sitt og gefa manni stundum ljótt augnaráð
Í gær fór ég til Sigga Atla vinar míns til þess að biðja hann um að hjálpa mér við nýju rottu dagbókina mína, ok allt gekk vel þar til það Hræðilega kom fyrir. Síðan hans Sigga varð fyrir slysi og hann verður að byrja upp á nýtt á henni. Mér leið eins og hryðjuverkamanni þarna heima hjá honum í turninum hans. Allt er að smella saman fyrir Sólstöðuhátíðina, Fólk og Fjöll sem verður á Austurvelli þann 21. desember.
Annars er Illugaskotta ekki hress þessa dagana en lætur samt lítið á því bera, því hún saknar fjallanna í Ódáðahrauni. Langar smá að tjá mig um stjórnvöld í dag, bara pínu oggulítið.
En þau velja alltaf desember til þess að taka afdrifaríkar ákvarðanir varðandi náttúruna á Íslandi, skítlegt bragð hjá þeim. Því stjórnvöld vita að fólk hefur um nóg annað að hugsa en ákvarðanir stjórnvalda rétt fyrir jólin.
Í fyrra gaf umhverfisráðherrann/ umhverfisfrúin okkar hún Sif íslensku þjóðinni jólagjöfina " Kárahnjúkavirkjun" og þetta verður einnig jólagjöfin í ár frá íslenskum stjórnvöldum til þjóðarinnar. Frumleg heitin eru að fara með íslensk stjórnvöld það verð ég að segja þegar verið er að tala um jólagjafir. Hver vill fá sömu jólagjöfina ár eftir ár? Enginn!!!!

Fór annars á Gráa köttinn í morgun sem er kaffihús á Hverfisgötunni til að hitta Sólstöðuhópinn, þetta kaffihús fær þann stimpill frá Illugaskottu að vera það dýrasta í bænum og það bókalegasta því þar eru bækur sem hylja flest alla veggi. Mig langaði að spyrja í morgun þegar ég grútsyfjuð las yfir matseðilinn, skoða bara verðin. "Eigið þið virkilega ekkert að éta hér í þessari holu sem er undir 650 krónur:"? Því það ódýrasta sem þú getur keypt á Gráa kettinnum er á 650 krónur!!. En ég hélt aftur af mér og ákvað að vera jákvæð í dag, fékk mér mjólkur kaffi/ kaffe latte, eins og það heitir á matseðlinum.

Eigið þið góðan dag í dag, það ætlar Illugaskotta að eiga þótt hún sé svoldið leið í dag.

miðvikudagur, desember 11, 2002

Einu hef ég verið að velta fyrir mér í dag, það er hvað það er frábært að búa í banana lýðveldi, maður bara notar visa kortið sitt og endalausan yfirdrátt, kaupir 1944 rétti, Dominoz pissur, bíla á lánum eða leigir hann bara,mað'ur þarf einfaldlega ekki að hugsa því það er hægt að treysta þessum stjórnmálamönnum sem eru inn á hinu háa Alþingi, og stundum er bein útsending frá Alþingi sem mjög fáir horfa á og þeir sem horfa á þessa útsendingu verða skelfingu lostnir því þeir sjá að það eru staðnaðar hugmyndir og stöðnuð gildi sem eru það sem virkar inni á Alþingi. Við lifum í snældu vitlausu lýðveldi sem vill drekkja öllu sem er einstakt en hefja á stall allt það sem er staðlað og skipulagt. Fúllt! Kannski er hægt að vekja fólkið í bananlýðveldinu? En vill fólkið í bananlýðveldinu Íslandi nokkuð láta vekja sig, það verður bara úrillt eins og þegar maður er að reyna að vekja gömul tröll, rymja og stynja og neita að opna augun því það er ekkert auðvelt að gera sér grein fyrir þessu bananalýðveldi og rífa sig í burtu frá svefninum þægilega sem oft inniheldur ansi skemmtilega drauma.
blogger.com

þriðjudagur, desember 10, 2002

Ég er að setja upp blogg vissi varla hvað þetta fjandans blogg var/ já dagleg dagbók er það ekki bara, var í prófi í dag gaman að fara í próf því að þau valda stressi og spennu sem ég sæki í,,,var annars að kaupa jólagjafir til að senda til útlanda, og pakka inn og skrifa jólakort ekki uppáhalds iðjan mín einhvers konar verk sem já illu er best af lokið. Stollt af sjálfri mér, hlustaði á diskinn Rapp og rímur,,hann kemur á óvart og mæli með honum í jólapakka til útlanda sérstaklega til þeirra sem ekki tala íslensku :).

Ég er orðinn bloggari, dagbókar rotta er betra orð finnst mér. Annað hvar er veturinn? Hef gaman af frosti og vetri og sofa úti í garði í frábæra dúnpokanum mínum, nei því miður það er ekki hægt því þú drukknar í rigningunni...... ´vammmmm þetta dagbókar rottu dæmi er frábært.

Og það er rigning enn einn daginn, og ekki kemur það mér lengur á óvart. Annað var að horfa á Kastljós með öðru auganu og skapa rottu dagbókina mína með hinu þegar verið var að dæma bókina hans Davíðs Oddssonar sem er nú ekki frásögu færandi þótt hann sé nú forsætisráðherra vor, en sem sagt þessi knái bókagagnrýnandi (hún) sagði bara "bókin kemst ekki á flug" eða það var setningin sem flaug inn um eyrað mitt og út um hitt, margt annað var sagt. En Davíð er bara ekki að verða frægur sem rithöfundur hann bara er fyndinn ekkert meira. En kannski virkar þetta þannig að bókagangrýnandinn verður tekinn inn á stóra bláa teppið hans Davíðs og þar verður hún skömmuð og flengd. " Skamm skamm svona segir þú ekki um mig því ég er forsætisráðherrann þinn"

En hver er Ilugaskotta? IIlugaskotta var skírð Björk Bjarnadóttir við lítinn fjörð úti á landi, hún er 28 ára hávaxinn þjóðfræðingur, er í meistaranámi í umhverfisfræðum við HÍ, og hef verið að skottast um fjöll og öræfi á sumrin sem landvörður. Hygg að frekara nám í Kanada veturinnn 2003-2004, því þar er svo mikið af úlfhundum og indíánum. Best að fara að drekkja sér í vistfræðinni sem er mitt seinasta próf.