mánudagur, desember 06, 2010

Hef uppgötvað nýja aðferð til háreyðingar í nefi:"Stinga hausnum yfir pott sem í er sjóðandi rauðvínsedik og anda inn". Búkonur leggja margt á sig í matargerðinni, og eitt er að búa til rabbabarachutney.

Húsið er edikað og svo er búkonan.

En andinn er kátur þótt það svíði í nefið.


föstudagur, desember 03, 2010

Blogg krefst athygli, ég er með athyglisbrest. Stend mig alls ekki í stykkinu.

Illugaskotta hefur verið kölluð búkona af nokkrum. Ætla að búkonast um helgina: búa til jólagjafir sem bara er hægt að borða og endurbræða geitamjólkur súkkulaðisápuna mína.

Sú bansetta sápa mistókst hrapalega í sumar og í hana komu alls kyns útfellingar, þá er eina ráðið að rífa hvert sápustykki niður í rifjárninu með höndum. Síðan skella í pott með smá af vatni, endurbræða á mjög lágum hita og hella aftur í form. Vona síðan að allt virki vel og hægt sé að baða sig upp úr súkkulaðigeitarmjólkursápu....langt orð.

Þetta hef ég aldrei gert áður, eins og svo margt annað sem ég tek mér fyrir hendur.

Góða helgi...ps ég heyrði fyrst sagt "góða helgi", þegar ég var við nám við Menntaskólann við Sund í Reykjavík, þetta var árið 1990, þegar ég var í fyrsta bekk. Ég utan af landi stelpa hafði bara aldrei heyrt þetta sagt áður, heima fyrir norðan voru bara dagar og þeir voru allir jafn skemmtilegir.

Smá rykkorn fyrir helgarpælinguna ykkar.




föstudagur, nóvember 19, 2010

Illugaskotta er með áhyggjur af ræktun á erfðabreyttu byggi og hvað eina sem er erfðarbreytt. Vildi óska að Ísland yrði yfirlýst lífrænt vottað land og án erfðabreyttra matvæla og fræja

Varúðarreglan ætti að gilda um þessi mál sem þýðir að það ætti alls ekki að taka inn ræktun á erfðabreyttum fræjum eða flytja inn erfðabreytt matvæli. Vitum við nokkuð hvað við erum að borða? Eru ekki vínber án steina erfðabreytt matvæli?

Það er ekki búið að rannsaka þessi matvæli nóg, og engin veit hvaða áhrif þau hafa á manneskjur, dýr eða náttúruna. Þeir sem eru fylgjandi ræktun með erfðabreyttum fræjum segja að það stafi engin hætta af erfðabreyttu fræjum eða matvælum. Dæmi hver fyrir sig en náttúran er sú sem okkur ber að vernda og lifa í sátt og samlyndi við. Þegar erfðabreytt fræ blandast inn í óerfðabreytt fræ þá er komið fram eitthvað afbryggði sem ekki er búið að rannsaka og ekkert er vitað um áhrifa þess afbrygðis á náttúruna. Einnig gæti hið óerfðabreytta fræ horfið af sjónarsviðinu og hvaða áhrif myndi það hafa?

Þetta er hættulegur leikur.

Fyrir þá sem ekkert skilja í þessu orði: erfðabreytt, þá þýðir það sem sagt að vísindamenn eru búnir að krukka í DNA erfðaefni, taka t.d. út erfðaefni sem lætur steina vaxa í vínberjum og setja eitthvað annað erfðaefni í staðinn úr einhverjum öðrum ávexti sem lætur viðkomandi afurð t.d. vaxa ógnar hratt þannig að hægt er t.d. að hafa 4 sinnum á ári uppskeru sem áður var t.d. bara einu sinni á ári. Allt snýst þetta um skjótan gróða, hagvöxtinn ógurlega og á kostnað hvers?

Kosntaðurinn lendir á heilsu okkar og heilsu jarðarinnar.

Ég tók þessa skilgreiningu á varúðarreglunni af vef Umhverfisstofnunar, www.ust.is

Varúðarnálgunin

Í niðurstöðum Ríó-ráðstefnunarinnar var viðurkennt það sjónarmið að náttúran skuli að jafnaði njóta vafans. Þetta er hin svokallaðavarúðarnálgun (precautionary approach) sem er að finna í Ríóyfirlýsingunni um umhverfi og þróun. Þessi nálgun er sett fram í 15. grein með eftirfarandi hætti: Í því skyni að vernda umhverfið skulu ríki í ríkum mæli beita varúðarreglunni eftir því sem þau hafa getu til. Skorti á vísindalegri fullvissu, þar sem hætta er á alvarlegu eða óbætanlegu tjóni, skal ekki beitt sem rökum til þess að fresta kostnaðarhagkvæmum aðgerðum sem koma í veg fyrir umhverfisspjöll. Varúðarreglan hefur á undanförnum áratugum rutt sér til rúms sem meginregla í alþjóðlegum umhverfisrétti. Hún var fyrst sett fram árið 1987 í Lundúnaryfirlýsingunni sem kom í kjölfar aþjóðlegrar ráðstefnu um verndun Norðursjávar og er nú einn af hornsteinum umhverfisréttarins. Varúðarreglan á við þegar fyrir liggur, að framkvæmd muni líklega valda alvarlegu eða óbætanlegu umhverfistjóni, en ekki er hægt að sanna það vísindalega. Þá ber að beita þeim aðgerðum sem nauðsynlegar teljast til þess að koma í veg fyrir slíkt tjón og óheimilt er að bera fyrir sig skort á vísindalegri fullvissu um að tjón sé yfirvofandi.


mánudagur, nóvember 08, 2010

Illugaskotta telur Jón Gnarr vera ferskan andblæ inn í kolryðgaða íslenska pólitík, hann vill breyta stjórnmálunum.

Er að skoða hvernig er hægt að búa til hreinsilegi fyrir eldhús, baðherbergi, spegla og gler úr ediki, vatni, matarsóda, ilmkjarnaolíum, og jurtasápu.

Það er hægt að spara peninga um leið og þú ert að taka þátt í því að vera umhverfisvæn manneskja. Það eru til hundruðir ef ekki þúsundir tegunda af hreinsilögum, þeir eru í öllum litum og innihalda efnasambönd sem eru ekki holl okkur eða umhverfinu. Ég man eftir því þegar ég var barn hvað ég kvaldist þegar ég þurfti að ganga með fram rekkanum sem innihélt þvottaefnin, ég gat varla andað og varð illt í nefinu.

Það er hins vegar mjög dýrt að kaupa umhverfisvæna hreinsilegi og þess vegna er kostur tvö að búa þá til heima. Það á ekki að vera á fárra færi að vera umhverfisvænir heldur allra.

Uppskrift af umhverfisvænum og ódýrum uppþvottarlegi:

500 gr af Jurtasápu, fæst í Jurtaapóteki Kolbrúnar grasalæknis, Laugavegi 2
20 dropar af þinni uppáhalds ilmkjarnaolíu, þær fást í flestum heilsubúðum.
Illugaskotta mælir með sítrónu ilmkjarnaolíu eða lavender.

Ekki henda gömlum uppþvottarbrúsum því í þá getur þú sett nýja, ódýra og umhverfisvæna uppþvottalöginn þinn í. Einnig geyma gamla spreybrúsa undan gluggaspreyji t.d. því í þá er hægt að stetja heimagerða alhliða hreinsinn og gluggahreinsinn.

Uppskrift af alhliða hreinsi, fyrir nærri allt sem þarf að þrífa.

2 tsk jurtasápa
2 matskeiðar edik
2 bollar heitt vatn
1/4 tsk lavender eða eucalyptus ilmkjarnaolía
3 dropar tea tree ilmkjarnaolía

Blandið öllu saman og setjið í spreybrúsa, notist á nærri allt nema gler.

Uppskrift af klósettskálarhreinsi
Það er ekki gaman að þrífa klósettið segir Illugaskotta! En þegar þú notar þessa blöndu þá er gaman.

1/2 bolli matarsódi
1/4 bolli edik

Dreifið matarsódanum yfir klósettskálina eins og það sé komin snjókoma ofan í klósettinu þínu og svo kemur það skemmtilegasta! Helltu edikinu yfir allt saman...friss !!!!!...gaman...og svo skrúbba eins og enginn sé morgundagurinn. Frábær hreinsivökvi...sem hefur góð áhrif á allt og alla.

Uppskrift af speglahreinsi, má nota á gler líka

1 1/2 bolli edik
1/2 bolli vatn
4-8 dropar af þeirri ilmkjarnaolíu sem nefinu þínu líkar vel við. Nefi Illugaskottu líkar best við appelsínuilmkjarnaolíu í þessa blöndu.

Nú er bara að hella sér út í að viða að sér þessum innihaldsefnum, bjóða vinum og vinkonum að koma líka með þér í þetta verkefni og blanda svo saman nokkrar blöndur.

Illugaskotta óskar ykkur góðra og umhverfisvænna daga við þrifin.









sunnudagur, nóvember 07, 2010

Illugaskotta er mætt á svæðið! Stika aftur inn í hinn stóra netheim. Ég hef alið manninn lengi úti í Kanada á indjánaslóðum en þeirri dvöl lauk í byrjun janúar 2010. Veit ekki alveg hvað ég ætla að segja í þessu bloggi og stika hægt inn á þetta vefsvæði.

Hef svoldið fengið nóg af álversumræðunni og dottið þetta í hug:


Hugmyndir fyrir atvinnuskapandi og sjálfbæra atvinnusköpun.
  • Uppbygging stórra gróðurhúsa sem myndu framleiða lífrænt og ekki erfðabreytt grænmeti og ávexti. Viðskipti með lífrænt vottuð matvæli eru þau viðskipti sem fara hvað mest vaxandi í Bandaríkjunum í dag, þessi viðskipti eru framtíðin, það er ekki hægt að borða ál, við getum lifað án áls en ekki án matar og vatns.
  • Uppbygging heilsuferðaþjónustu sem snýst um að komast í náttúru sem er ómenguð, án mengandi efna, hávaða og ljósa.
  • Uppbygging menningarviðburða út um allt land, nýta félagsheimli og bíóhús sem flest hver eru algerlega ónýtt úti á landi.
  • Tækniþróun á endurnýtanlegum orkugjöfum. Sólarorku, vindorku, sjávarorku.
  • Koma bönkum og stjórnvöldum í skilning um að framtíðin fellst í endurnýtanlegum orkugjöfum og að í boði séu styrir og lán fyrir þá sem vinna að þróun þessarra orkugjafa.

Nú er komið nóg í dag, Illugaskotta er farin á Kjarvalsstaði til að klæða sig upp sem þvottakonu.