Blóðbankinn er málið var að koma frá því að gefa blóð. Ótrúlega gott að losna við þessa 450 ml, fá að tala við skemmtilegar hjúkkur, svo eftir að allt er búið þá er bara hlaðborð inni á kaffistofu sem inniheldur allt mögulegt, í dag var það nýtt að það var nammi, muffins, ávextir og kókoskossar, svo étur maður í sig orku, blaðar í nýjustu blöðunum og lætur sér líða vel. Ekki slæmt slor. Mæli með Blóðbankanum við alla þar sem þetta endurnýjar blóðbirgðirnar hjá fólki, léttir á skrokknum og maður lætur gott af sér leiða. Sem sagt konur mega gefa á 4 mánaðar fresti en kallar á 3 mánaðar fresti. Það vantar alltaf nýja blóðgjafa, nú er ég með áróður og predikanir en er víst alltaf að predika eitthvað.

Tvær manneskjur hafa viljað fá bílinn minn lánaðann til að skreppa á fjöll en ég á að sitja heima. Hef svoldið velt þessu fyrir mér, ég meina enginn vildi fá litla bláa bílinn minn lánaðann þótt hann væri jeppa ígildi og væri með dráttarkúlu. Hins vegar þá hef ég sagt :"Nei".Verið leiðinleg.

Hvað er annars markvert? Stjórnmálin eru hrein hörmung, allir vilja útrýma fátækt og hjálpa öryrkjum sem er að hinu góða en afhverju allt í einu núna? Nú til að fá atkvæði maður.
Í myndinni "Englar alheimsins" þá sagði aðal söguhetjan Páll að örykjar heita öryrkjar því þeir yrkja svo hratt. Nýr flokkur kominn fram. Stríðið er enn þá og bráða lungnabólga gengur yfir heiminn. Hún mun koma hingað það er bara spurning hvenær?

Vá lyktin úti er ótrúleg, prófið bara að fara út, hvort sem þið eruð fyrir norðan eða sunnan....

Snjór,,,sybbinn,,,,,nenni ekki að skrifa neitt. Afhverju er rafmagn svona dýrt en allt fullt af virkjunum sem eiga að auðvelda okkur lífið? Afhverju hætta sumir vinir mans að hafa samband við mann? Er maður alltaf að móðga fólk eða er ég svona rosalega flæmandi leiðinleg? Eða hefur fólk almennt ekki tíma fyrir vini sína? bleugh,,,dæs.

1.apríl í dag. Svavar vinur minn laug að mér að hann væri með orma í maganum, sem löfðu út um rassinn á honum. Ég bara: "Ha, nei er það",,,allt í einu fóru varúðar bjöllur um lygi að hringja í hausnum á mér,,en þær virka mjög illa. Það er alltaf hægt að ljúga að mér.

Eitthvað markvert að gerast? Humm,,,, stökk af einum stöppli yfir á annan í hádeginu, hélt að ég myndi ekki ná á milli,,stöpplarnir eru fyrir neðan Aðalbygginguna og það er frekar langt á milli, svona tilfinning þegar maður stekkur að kannski nær maður ekki á milli allt brotnar í manni sem brotnað getur, buxurnar rifna ó nei! en svo þegar maður lendir á hinum stöpplinum þá líður manni vel.

Smalaði fuglum með tveimur heimspekingum, fuglum sem hvæsa. Hálsbólga, verktaka vitleysa við bókaútgefendur. Langar úti í sveit, sofa úti í skafli í svefnpokanum mínum góða. Glúmur ofur köttur sem er maður í álögum er allur að ná sér eftir umferðarslys sem átti sér staða fyrir 3 1/2 viku, skottið hefur verið lamað en það er allt að koma til og kötturinn líka.

Hver stenst það að opna eina öskju?

Spurning dagsins: Hver var Pandóra, og hver er sagan á bakvið öskjuna hennar? Svar óskast strax.

Er hætt að geta logið að mér að það sé fínt að vera hérna í Reykjavík hér er bara ekki fólk af mínu sauðahúsi, kannski er það fólk ekki til.

Átti góðan þynnkudag í gær, ekki þynnka af verstu gerð, svona heiladauð þynnka, veldur því að maður kemur fáu í verk, liggur eins og skata fyrir framan sjónvarpið í svefnpokanum og horfir bara á allt, án þess að hafa skoðun á því, yndislegt. En nú er heilinn komin í gang en ekki maginn, langar að æla. Árshátíðin var góð, ballið var frábært, og djammið eftir það enn þá betra.Monnbots er skemmtileg hljómsveit, veldur því að maður ferðast langt aftur í tímann, til áttunda áratugarins....1. apríl er á morgun. Iðunn vinkona á afmæli í dag og ég er að fara að senda alla mína pappíra til Manitoba í dag, og svo er bara að bíða og sjá hvað kemur til baka.

Gæsir vöktu mig í morgun, gargandi að þær ættu að hækka flugið að ég held...bla bla...

Fyrirlesturinn gekk vel, þetta var bara gaman þegar á hólinn var komið! Árshátíð umhverfisfræðinema á morgun, förum á Sólheima að skoða vistvænt hús, drekka mjöð sem er bruggaður í þýskalandi og er vistvænn, sá besti í landinu og svo út að borða á veitingastaðnum Á næstu grösum og svo er aðalmálið,,,,ball með Moonbots á Vídalín, það verður stuð og allt þetta kostar 2500 kr! geri aðrir betur.

Einn vinur minn er með stríði, finnst það skrítið en hann segir að maður verður að fylgja sterkasta gaurnum, vera vinur sterkasta gaursins annars er maður ekki með. Gæti verið rétt, einnig segir hann að Bandaríkjamenn séu ekki hættir, þeir muni ráðast næst á Norður-Kóreu. Veit ekki,,nei er ekki fylgjandi stríði en er samt ekki alls staðar að mótmæla og öskra mig hása, réttlætiskend mín segir mér að stríð sé sama og rangur hlutur.

Í gærkveldi var menningakvöld hjá mér og Röggu. Menningarkvöldin okkar ganga út á það að það sem við gerum kosti ekki neitt en sé gaman. Í gærkveldi var það Kvæðamannafélagið Iðunn sem varð fyrir því óláni að við komum á svæðið, breddurnar tvær, en vorum að læra að kveða rímur. Voru um 20 manns þarna, með textahefti, hlustuðum á gamla kalla og kellingar ríma, sko af geisladiskum og svo gerðum við eins....gaman, fyndið, skemmtilegt fólk þarna. Já myndi segja að þetta menningarkvöld hafi verið betur heppnað heldur en þegar við fórum á kvöldvöku hjá Indlandsvina félaginu, þá urðum við bara hræddar við það að fá hláturskast af verstu gerð og dirfðumst ekki að horfa á hvor aðra allt kvöldið því við vissum að við myndum missa andlitið af hlátri,,,,hahaha, helgina er að koma,,,jú jú allt í fínu með það..get bara ekki beðið eftir því að flytja í burtu frá Reykjavík.

Þetta styður Davíð 0ddsson og Halldór Ásgrímsson,,,,það hefði verið hægt að gera eitthvað annað en að ráðast á Írak. Stríð er aldrei réttlætanlegt

ÞETTA ER RAUNVERULEIKI STRÍÐSINS. VIÐ SPRENGJUM. ÞAU ÞJÁST OG VIÐ TÖKUM MYNDIR!

Robert Fisk

Grein eftir breskan stríðsfréttaritara í Independent on Sunday í morgun. "Það er eitthvað sjúkt, viðbjóðslegt við þessar spítalaheimsóknir", skrifar hann. "Við sprengjum. Þau þjást. Svo birtumst við til að taka myndir af meiddu börnunum þeirra... Í gær spurði breskur útvarpsfréttamaður íraskan lækni: "Gæti ekki verið, doktor, að eitthvað af þessu fólki hafi verið hæft af íröskum loftvarnarflaugum?" Eigum við að hlæja eða eða gráta eða af hverju kennum við "þeim" um sár þeirra?"

Fjölmiðlar og stríð,,,

Það var víst 16. sætið sem Íslendingar vermdu oft,,ekki það 19. Er í stress kasti, eftir 6 tíma á ég að vera með fyrirlestur sem ég er ekki byrjuð á, fyrir 23 manneskjur og annað, fyrirlesturinn á að vera á ensku um skoðanir Johns Passmore á fyrir hvern náttúran sé, hvort maðurinn sé hluti af náttúrunni eða ekki og bla nákvæmlega,,,,það er erfitt að festa hendur í hári þessara hugmynda.....!!! gargggggggg

Halldór Ásgrímsson var víst grillaður á hádegisfundninum í gær í Háskólanum en það var ekki sagt í blöðunum, einungis að margar fyrirspurnir hefðu borist, það hefði verið mikið um frammíköll og að fundarstjóri hafi átt í vandræðum með að hafa hemil á æstum lýðnum.

Helvítis íslensku fjölmiðlar, þjarma aldrei almennilega að stjórnmálamönnum, spyrja allt of stutt óþægilegra spurninga og krefjandi...eru að ég held hugstýrðir af þeim sem eiga allt.....samsæris kenning Illugaskottu...

Mér finnst að íslenskir fjölmiðlar eigi að taka sig á,,,steikja stjórnmálamenn, láta þá svitna í sjónvarpi, blöðum og útvarpi,,,hummm sér þá bara svitna í sjónvarpi, heyrir þá svitna í útvarpi og getur ímyndað þér þá svitna í blöðunum. Hvað er mest aðlaðandi. Ætla í sund þegar ég er búin að stikna og svitna upp við töflu í dag, malandi á ensku um náttúru siðfræði,,,úfff mér kvíður fyrir.

Mér er boðið í afmæli á Ströndum á afmælisdaginn minn, það er sniðugt. Mun mæta í afmælisveisluna hennar og mína...Snúlla/Ásdís verður 60 ára þann 16. apríl og ég verð 29 ára, þetta verður mega fjör. Margar tölur.

19. sæti okkar Íslendinga í gæðum neysluvatns er víst rangt sæti, við eigum að vera miklu ofar. T.d. er Finnland með mestu gæðin en þeir nota yfirborðsvatn sem þarfnast sífelldrar gæslu og mælinga, einnig eru þeir með mjög fullkomnar hreinsistöðvar. Við á Íslandi erum hins vegar með það gott neysluvatn að það þarf ekki þessa hreinsun, grunnvatnið okkar hreinsast í jarðveginum, agnir sem ekki eiga að vera í vatninu loða við jarðveginn og verða eftir, út og upp kemur hreint vatn, kannski ekki alveg svona einfallt en nokkrun vegin. Rangar forsendur og rangar rannsóknir sem veldur því að við lendum mjög neðarlega, í hinu gamla og góða Eurovision sæti. 19. sætinu

Íslenska vatnið er mjúkt, efnasnautt og hreint. En við hugsum ekki nógu vel um vatnið okkar, þá varðandi eftirlitið og mælingarnar og að ganga nógu vel um vatnsbólin. Í framtíðinni og kannski þegar núna munu verða háð stríð um auðlindina VATN.

Stjónvöld á Íslandi hafa enga stefnu varðandi auðlindina vatn og er líklega vegna þess að þetta er auðlind sem við höldum að haldi sér við sjálf og að við eigum nóg af vatni, þurfum því ekki að hafa áhyggjur en ég segi að þetta sé auðlind sem þarf að huga að.

Sverrir Jakobsson er maður hér í borg, hann er bloggari, ég stal þessu frá honum áðan, fáir sem eru eins vakandi fyrir atriðum eins og þessu.

Eitthvað fyrir Ágúst Flygenring: Nýr forsætisráðherra Miðafríkulýðveldisins heitir Abel Goumba.
Þetta vakti forvitni mína, því að maður með sama nafni gegndi sama embætti árið 1957-1958. Við nánari athugun reyndist þetta líka vera sami maður.
Er þetta ekki einhvers konar met? Ekki einu sinni Fidel Castro var við völd árið 1957!

hahahahahah þetta er súrt, völd og menn og allt...

Talaði svo mikið í gær að ég varð þreytt í tungunni. Hitti mikið af skemmtilegu fólki, ræddi um tíkur og hunda, völd, sannleika, misræmi, ósamkvæmni, át kjúkling, horfði á rosalega áhugaverðan dýralífsþátt um spendýr, mig langar til Ástralíu til að skoða breiðnef og mjónef, þetta eru einu spendýrin sem verpa eggjum. Er byrjuð í siðfræði kúrs um náttúruna, áhugavert. Dagurinn fór í fólk en ekki verkefni.

Nenni ekki að tjá mig um stjórnmál í dag, hef lítið fylgst með. Þetta stríð er fjölmiðlastríð og valda brölt hjá U.S.A. Leiðist það líka. En flest allt annað er skemmtilegt. Margir vinir mínir eru leiðir þessa daganna, ég reyni að segja eitthvað upplífgandi en langar mest að segja.
"Halló, þið eruð á lífi, skál og dettum í það!" Veit ekki hvernig ég á að ráðleggja fólki, hlæ þá bara af því og bulla einhverja vitleysu, kannski ekki góður vinur það. Sólin er komin, það var hríð þegar ég var að labba eftir sundlaugarbakkanum úr gufunni, fann ekki fyrir kuldanum var steikt eftir ofur langa legu.

Stjórnmál: staðreyndir. Sjálfstæðisflokkurinn og framsóknarflokkurinn eru að tapa fylgi með stríðsrekstri, hinir flokkarnir græða og ekki síst Frjálslyndi flokkurinn, fyrrverandi sjálfstæðis bla fólk....

Flakkaði um bæinn í gær, með Svavari vini mínum. Leituðum mikið að hnallþórum, rjómafylltum risa tertum en þar sem þær voru var allt fullt af fólki slefandi í kringum þær. Enduðum á Alþjóðahúsinu, vissum ekki í hvaða landi við vorum. Fórum svo í Þjóðmenningarhúsið, fullt af sýningum þar í gangi. Landakortasýning, þróun landakorta á Íslandi, fornmannasýning, Skáld mánaðarins er Grímur Thomsen að þessu sinni og svo er það sýningin um handritin. Mikið fornaldar dýrkun og þjóðrembu stíll í þessu húsi. Ég var skömmuð af verðinum. Þarna er tvö fundarherbergi sem eru opin almenningi, ég sat í stól og var að tala við Svavar, þá kemur vörður og segir:" Það er bannað að leika sér í stólunum." Ha allt bannað einnig að ,,,leika sér í stólunum t.d., ég var ekki að hoppa í stólunum eins og bandbrálaður krakki, ég hafði ekki hoppað upp á borð, ég hafði bara verið að halla bakinu á þessum örugglega 100 þúsund króna dýra fjandans stól og ræða málin við Svavar. Hvernig hafði hún vitað af okkur í þessu herbergi? Málið er það að það eru myndavélar í öllum herbergjum og verðirnir fylgjast með manni. Þannig var nú það,,,,ég sagði ekki neitt eina sem ég gerði var að strunsa út. Vörðurinn sagði " Ég er nú ekkert að henda ykkur út og ætlið þið ekki að kíkja á fornaldamanna sýninguna?" Nei, leiðindarskass, hugsaði ég. Alltaf verið að skamma mann, þó maður geri ekki neitt.

Ný list hefur litið dagsins ljós á veggjum húsa í Reykjavík. Stensílar, spreyjað, orð til borgaranna. Þar á meðal er stensill af Dabba for,,,,,,þar sem honum er þökkuð stefna stjórnvalda með rauðu spreyji,,,svona meira gagnrýni á hann. Einnig eru orð eins og "Lagið er stolið" spreyjaðar á veggi og gangstéttir. Flott list sem hægt er að finna í húsasundum borgarinnar.

Frétt dagsins er sú að það voru þrumur og eldingar í Öræfasveitinni í gærkveldi og það sprakk tölva, hann Siggi vinur minn sem býr á Hnappavöllum var að grúska í tölvunni sinni í rólegheitunum þegar allt í einu hún springur bara framan í andlitið á honum, reykur og eldur. Það fór sem sagt elding í tölvuna og hún sprakk!!! Bang með stórum hvelli, greyið Siggi, ég hef nú ekki heyrt neitt í honum og fékk þessar frengir í gegnum smáskilaboð. Var að reyna að hringja í hann en hann svarar ekki. Sé hann í anda, svartan í framan með hárið allt út í loftið, stór fyndið en hið mesta tjón myndi ég segja fyrir hann.

Herferðin sjálfstæðra kvenna liggur en undir minni herferð, er enn þá pirruð út í þessar hundlélegu þinkonur sjálfstæðisflokksins, hvar eru kraftmiklar konur að fela sig? Þorgerður Katrín Gunnarsdóttir er sú eina sem kraftur er í, sjáið þið dómsmálaráðherra sem lét smíða sérstak skíthús upp á margar milljónir undir rassgatið á sér, með einka wc gellan, lufsa, kraftlaus, leiðinleg, ótrúverðug.

Brjálaður maður réðst að mér í pottinum í Vesturbæjarlauginni í morgun, eða réttara sagt frústreraður karlmaður, búin að fá nóg af yfirgangi íslenskra kvenna held ég bara, hann leit þannig út. Hann var að tala um það hvað það væri gaman að vera í Singapore og þarna í Asíu því þar færu þjónustukonur alveg niður á hnén áður en þær setji matinn á borð, þegar þær beygðu sig þá sæi hann lærin á þeim,,og svo þrumaði hann með bolabíts rödd, lyfti sér á fætur upp úr pottinum og horfði beint í augun á mér:" Þarna er komið fram við mann eins og maður sé karlmaður." ! Ég horfði bara á móti og hugsaði :" Þessi gaur er með BFG af háu stigi og er fullur af rasisma og kvenfyrirlitningu" vinur hans kinkaði kolli með honum, augun urðu dreymin til horfinna tíma í Asíu með undirgefnar konur í kringum sig,,,,, Vá,,,en ég var bara aðeins búin að þenja mig um utanríkisstefnu okkar aumu stjórnvalda, og að ég þyldi ekki að U.S.A liti á sig sem alheimslögguna miklu og mættu bara segja að þessi og hinn mættu eiga svona og svona mikið af vopnum en þeir mættu eiga öll heimsins vopn. Vesturbæjarlauginn er laug atburðanna.......

Vor, vor, ég bara get ekki hamið mig, langar að hlaupa um öll tún og fjöll og fjörur. Tjaldurinn, skúmurinn og álftirnar hrannast til landsins.
Fór á mótmælin í gær, varð að sjá þessar rauðu skellur á stjórnarráðinu, svona alveg búið að gefa skít og málningu, rauða málningu í Dabba og Dóra, sandkassa strákana ógurlegu, sem öllum stendur ógn af,,,,svona finnst þeir vera svona já leikfangahandlangarar, ekkert smá langt orð. Er að kúka í mig í alvörunni en ætla að skrifa þetta, mun bara hnoða á meðan hehehe,,,,á morgun verður vatnsráðstefna í ráðhúsinu því það er dagur vatnsins, byrjar klukkan 11:00 og verður til 17:00 og ég á að mæta sem ég mun gera. Langar alveg ótrúlega mikið í drulluleðju pottinn sem ég svamlaði í, í haust og stefnan er á þennan leðjupott fyrir vorið, en Landmenn kalla þennan pott, baðströndina.

Annars fréttirnar eru leiðinlegar, stjórnmálin einsleit og ég er orðin ein vorbomba.

Hörmulegur dagur því það er komið stríð og íslensk stjórnvöld meiga skammast sín að styðja þennan viðbjóð, mikið er ég samt fegin að búa á Íslandi þótt að sjálfstæðis hörmungin og framsóknar ræflarnir stjórni því.
Fór að sjá sænsku myndina Lily 4-Ever í gær, þetta er mynd sem kemur manni ekki til að brosa, þetta er mynd um rússneska 16 ára stelpu sem er seld til Svíþjóðar, þar er hún læst inni í íbúð á daginn en eigandi hennar nær í hana á kvöldin á hvítum Bens og selur hana körlum sem vilja ríða henni. Myndin fjallar um hið svokallaða mansal ég myndi segja þrælahald sem á sér stað út um allan heim í dag, og víst einnig hér á Íslandi. Mynd um raunveruleikann, sæki ekki mikið í þær, vil afþreyingu sem kemur mér til að brosa og færir mig frá raunveruleikanum.

En ekkert jákvætt í dag, jú t.d. já látum okkur sjá. Stelpan á bensínstöðinni sem afgreiddi mig í morgun var ótrúlega glaðleg á svipinn og hress, svona sjaldgæfur kassaafgreiðslumaður, hún var í spjall stuði. Gæsirnar við BSÍ eru alltaf áhugaverðar, fullar af blýi og öðrum efnum sem ekki væri gott að fá í skrokkinn og ég er að lesa frábæra bók Agga gagg, eftir Pál Hersteinsson sem var að rannsaka refi á ströndum 1977-1978 að mig minnir. Ótrúlega skemmtilegar lýsingar í þessari bók af hinum ýmsum melrökkum og manneskjum, þekkti t.d. tvo sem eru í bókinni, Pétur í Ófeigsfirði og Guðjón frá Dröngum, sem gerir það að verkum að bókin er enn þá skemmtilegri.

Konur meiga ekki brosa og ekki fara í tannhreinsun því þá finnst mér þær hallærislegar! haha, nei ekki alveg pirrið í mér varð brjálað. Einn bloggari sagði að ég væri ekki samkvæm sjálfri mér. Er lítið að pæla í því að vera það eður ei. Fundarherferð sjálfstæðiskvenna fer í taugarnar í Illugaskottu því staða þessara kvenna er slæm innan flokksins og þær eiga bara að viðurkenna það og ekki vera að þessu ryk kasti í augun á kjósendum. Ekki er þessir sjálfstæðiskallar að kljúfa sig út úr flokknum í kosningabaráttunni! "Herferð sjálfstæðiskarla< var á síðum moggans í dag, nei glætan! að það komi nokkrun tímann eða hjá einhverjum öðrum flokki. Hallæri á skalnum 10 enn þá því þetta er ryk sem ég ætla ekki að láta blinda mig, bleugh!

Heil hörmung það sem hægt er að kjósa. Vill ekki framsókn né sjálfstæði því þeir styðja stríð, stóriðjupælingar sem eru skammsýni og eru einnig bara orðnir þreyttir gaurar, Halldór talar sífellt hægar og hægar, Davíð verður alltaf ófyndarni og ófyndnari með hverjum deginum sem líður. Þrír flokkar þá eftir þeir styðja ekki stríð sem er gott og gefur þeim stórann plús en samt,,,,,ég er stjórnleysingi og sá flokkur er ekki til fyrir mig.

Vatnsgæði er verkefni í lagi sem ég er að vinna í.

Fundaherferð sjálfstæðiskvenna! er yfirskrift einnar fréttar í Mbl á netinu í dag. Þessar kellingar vilja segja að kraftur sé í sjálfstæðiskonum, þær eru ekki að baka pönnukökur fyirr fundina hjá sjálfstæðis köllum eða hvað og þær eru sko aldeilis ekki upp á punt þarna til þess að sýna að konur komist nú til valda þarna hjá bláum?!!! Afhverju eru þær þá að fylkja liðið saman, bara konur, hvaða rugl er þetta eiginlega? Afhverju stofna þær ekki einhvern kvennalista bara? Leiðast myndir af þessum sjálfstæðis konun á opnu síðum moggans, brosandi út að eyrum, eitthvað svo ótrúlega "sjálfstæðar" og asnalegar. Hafa konur í einhverjum öðrum flokkum gert þetta saman? Nei, þær hljóta að vera eitthvað óöruggar með sig,einhvern vegin þá vita þær að staða kvenna er slæm í flokknum, fylkja liði til að kasta ryki í augun kjósenda, brosa, fara í tannhreinsun og fara í fundarherferð sjálfstæðiskvenna. Hallærislegt á skalanum 10!

Það er að koma stríð, ég er á móti stríði og á móti þessari alheims stjórnunarstefnu Bandaríkjanna. Bandaríkjamenn eru frekustu krakkarnir í sandkassanum, Dabbi og Dóri eru fyrir utan sandkassann en rétta leikföngin ef þau detta út fyrir sandkassann og brosa alltaf við þeim frekasa og lúta hans valdi. AULAR!!!!!! MEÐ HOR.
Er ekki vinstri sinnuð og ekki hægri sinnuð, langar ekki að kjósa neitt í vor, finn ekkert við mitt hæfi. Er stjórnleysingi.

Er búin að fá tvenn SMS sem segja mér á ensku að hætta að kaupa bandarískar vörur, jú jú það er svo sem ágætt að sleppa því, en eitt er það sem ég mun aldrei, sko ALDREI hætta að borða sem er frá U.S.A, það er Hunts tómatssósa, þegar ég dey þá ætla ég að fá eina með mér í kistuna, Illugaskotta er svona stór því hún hefur alltaf verið dugleg að borða tómatsósuna sína.

Kastjós var ansalegt í gær, sjálfstæðis hlunnkur að verja stefnu U.S.A svo vissi hann svo vel að það er óverjanlegt að hefja stríð.

Urðarköttur var Finnbogi rammi. Illugaskotta var Björk. Ég er alveg sniðug í dag, var að æfa mig með eldboltana mína í gærkveldi en kveikti ekki á þeim, er búin að sakna þess að sveifla þeim í kringum mig. Nóg að gera eins og alltaf. Fíflin eru farin að vaxa í görðum Reykvíkinga, krókusar stinga gulum og bláum hausum upp úr moldinni og annað, rabbabarinn er einnig farinn að vaxa. Nú er að koma blóm í haga og betri tíð. Líf mitt er ákveðið í heilt ár, var mér sagt í gær og það er satt, hef ekki einu sinni hugsað út í það.

Krummi hann er svartur, krummi er fuglinn minn. Hrafnar, heita Corvus corax á latínu. Ég hef mikinn áhuga á hröfnun, finnst þeir vera dularfullir og fyndnir, þeir leika ótrúlega loftfimleika hér á Háskóla svæðinu, snúa sér í hringi á fullri ferð í loftinu, ég held að þá séu þeir í ástarslag, og ég hef einnig tekið eftir því að þeir kjósa að sitja á hausum ljósastauranna hér í borginni og þá eru þeir líklega að hlýja sér á fótunum og ræða þar heimsins mál og nauðsynjar hrafna. Ótrúlegt finnst mörgum að hrafninn er stærstur spörfugla á Íslandi, en mörgum finnst að hrafninn sé ekki spörfugl þar sem hann er "ræningi" að margra manna mati, en hrafninn er flokkaður sem spörfugl því hann hoppar um eins og skógarþrösturinn til dæmis en er víst ekki eins sætur og dúllulegur og hinir spörfuglarnir. Spádómsfugl, það er hrafninn og einnig er hann uppáhalds fuglinn minn, því hann sýnir af sér mikla loftfimleika, er dularfullur fugl og einnig svartur. Einum vini mínum finnst hrafninn alltaf vera að tala við sig ef hann er að krúnka nálægt honum, að hann sé að segja sér einhverja vitneskju,spá fyrir honum eða kannski bara segja góðann daginn....

13. mars !!! Hvað er að ske??? Dagarnir og árin fljúga út um gluggann og inn í gleymskuna svona alla veganna sumir dagar sem ekki er vert að muna eftir. Binna vinkona var að spyrja mig afhverju ég skrifa aldrei um skólan og ég virðist alltaf vera að gera eitthvað annað en að vera í skóla. Það er líklega rétt, ég nenni ekki að skólast meir. En læt mig hafa það því þetta er alveg að vera búið. En þessa daganna er ég að móta lokaverkefnið mitt og reyna að koma skráningarmálum á hreint, er skráð inn í stjórnmálafræðideild!!! halló ég er þjóðfræðingur ekki pólitíkus!!! og er að leita mér að umsjónarkennara fyrir lokaverkefnið, og er einnig að koma Canada málum á hreint og græja pappíra fyrir vesturheim. Einhvern vegin allt út um allt en þannig er þetta gaman. Ég á afmæli í næsta mánuði, sama dag og Snúlla/ mamma hans Jóns Jónssonar á Ströndum, fræðabónda. Á ég núna að fara að pæla í stöðu minni í lífinu, nei!!! nenni því ekki þetta er nóg í dag...erum að fara í ferð á Línuhönnun í dag þannig að ég kemst ekki í leikfimi þar sem maður fær dóp eftir sprikklið í kroppinn. Lokaverkefnið mitt er ómótað, bara orð á blaði og í hausnum á mér, er að pæla í því að skrifa um útskýringar fólks áður fyrr á náttúrufyrirbærum og náttúrhamförum, hver var skilningur þeirra, hvernig og afhverju útskýrði þetta fólk hlutina svona, þjóðtrú og sögur tengdar náttúrunni.....dýr og plöntur, og steinar og galdrar......alltaf að gera það sem er skemmtilegt það er mitt mottó og drífa hlutina af....

Vorið er komið og grundirnar gróa. Fór í bíó í gærkveldi að sjá myndina Nói albinói, þessi mynd á já skilið það hrós sem hún hefur verið að fá, einlæg, fyndin, vel tekin, góð tónlist, góðir leikarar og snilldar flétta. Mæli með þessari mynd. Ég og Ragga hlógum og hlógum í hléinu því við höfuðum ekki hisst svo lengi og höfðum um margt að pískra. Svo fórum við á rúntinnn því ég hafði keypt mér geisladiska sem taka mann aftur til fortíðar, við urðum að fara aðeins aftur til fortíðar með Sálinni hans Jóns míns, ég veit!þetta er ekki góð tónlist en minningar fylgja þessum lögum, svona fyndin atvik frá því maður var 16 ára og var á sveitaböllum fyrir norðan að flippa. Einu sinni vorum við Iðunn að djamma í Miðgarði í Skagafirði, Sálin var að spila, húsið var fullt og við vorum fullar af gleði og einnig af allkóhóli. Svo allt í einu vorum við komnar upp á svið alveg hressar og þvílíkt montnar að vera þarna, nei nei, allt í einu liggjum við kylliflatar á dansgólfinu, þá höfðu dyraverðirnir ákveðið að dúndra okkur niður af sviðinu þar sem við vorum ekki alveg í takt við það sem var að gerast þar. Þetta var þvílíkt fyndið atriði, gellur í nokkrar sekúndur að okkar mati og aular frá helvíti þær næstu þar sem við flæktumst saman niðri á gólfinu....Fyndið bara fyndið...svo gleymdi ég diskunum í bílnum hjá Röggu þannig að ekkert flakk til fortíðar í dag hjá mér einungis Röggu sem keyrir um göturnar í dag með sólheimabros á andlitinu og örugglega í endalausu tímaflakki í fortíðinni.

Í gær var búið að teikna fjallamynd í rykið á hliðarglugganum á bílnum mínum, fjöll, sól og uppi á fjöllunum stóðu tvær manneskjur, mig langar á fjöllin núna,,og í nótt þá fraus myndin í frostrósir ótrúlega flott, einhver á ferð sem laumast um bílastæðin hér á Háskólasvæðinu. Sund og hjól í dag, nota hjólið eins mikið og hægt er, ætla að taka Guddu frænku á fimmtudaginn með mér upp í sveit, skutlum hjólunum á pallinn á jeppanum keyrum út í sveit og svo hjóla um eitthvert svæði og skoða, leita að keldusvínum og öðrum svínum. Veðrið er gott og ég er inni. bleugh, dæs og væl.

Sagan af því þegar ég var næstum því lamin af manneskju sem notar sama skónúmer og ég.
Sem sagt daginn sem ég vogaði mér í leikfimi hér í Háskólanum þá fékk ég "lánaða" skó sem ég hélt að væru óskilamunir og ætlaði bara að setja aftur á sinn stað þegar ég væri búin að svitna í þeim og hamast í þeim. Jæja ég laumaðist í þá og svo byrjaði leikfimin, það var hoppað, hlaupið og meira hoppað, mér varð vibbalega heitt á fótunum og fæturnir mínir kölluð á mig að hleypa sér út úr þessum illa lyktandi skóm, ég hlustaði á þá og segi bara sem betur fer. Hennti af mér skónum og hélt áfram að hoppa og skoppa. En svo kemur allt í einu manneskja upp að mér, gargar og argar, ég sagði bara ha! og horfði á hana, þá hvæsti hún á mig "Tókst þú þessa skó"? Ég bara" Humm já ætlaði bara að fá þá lánaða, ætlaði sko að skila þeim aftur". Hún:" Ég bara setti þá þarna því ég ætlaði í þá aftur, hvað er eiginlega að þér." heumm, já það er spurning? Hvað er ekki að mér? Ég var bara að hoppa og skoppa á meðan hún æsti sig og mundaði hnefanna. Ég ætla ekki að hugsa til enda ef ég hefði verið í skónum og hún komið, þá hefði ég fengið að kenna á því, kannski hefðu byrjað slagsmál á milli mín og hennar. Þetta var dagurinn þegar ég var næstum því tekin í annarar konu fótsporum.

Vera týndur eða týnd á jökli er örugglega ekki það sem margir vildu vera, afhverju ætli gaurinn hafi yfirgefið sleðann sinn? Vona að þeir finnist sem fyrst þessir gaurar. Ekkert markvert að gerast í mínu lífi, svona nokkurs konar ládeyða, flatneskja, forneskja. Hummm, kannski er efnafræðingurinn að leita á Langjökli.. Sólin skein hér í morgun og ég get notað öfga flottu sólgleraugun mín. Einhver hringdi í mig í gærkveldi, nennti ekki að svara því ég var að sofna, svo veit maður ekkert hvaða fjandans númer þetta er, eigandi finnst ekki skráður, hvaða réttlæti er í því? Pirr, pirr, urrrrr.....Megið þið eiga góða viku, með skattaskýrslunum ykkar.

Blind sem hreindýr í dag, augnlæknirinn horfinn á annan stað og lét mig hafa það að vera blind í dag, týni alltaf þessum linsum. Vill mæla með sýningu í Gerðarsafni, ljósmyndasýning blaðaljósmyndara komst bara til að skoða þessar svarthvítu sem eru í kjallaranum og þær eru snilld, hitt verður skoðað seinna. Svo er náttúrugripasafnið í Kópavoginum sem er við hliðina á Gerðarsafni einnig skemmtilegt það er inni í bókasafninu, fullt af fuglum, steinum, dýrum, og lifandi fiskar sem gaman er að fylgjast með. Þar er rosalega flottur örn uppstoppaður og risastór útselur, hann er stærri en ég, sem er 178 cm á lengd og 78 kg. Myndi ekki vilja lenda í maganum á útsel. Annars þá var Jói vinur minn annar í arkitektakeppni um sendiherrahús í Berlín, hann er öfga hress í dag, enda vann hópurinn hann marga peninga sem þau þurfa svo að skipta á milli sín, veisla hjá þeim í kvöld, mikið gaman, allir ofsa kátir.

Ég fór í leikfimi í gær, svokallað Areobik eða loftfimi ha! nei,,,þetta er svo fyndið, klikkað furðuleg spor, hlaupið og ærslast, bara var að deyja en neitaði að hætta, hef aldrei á ævi minni hlaupið eins mikið og leið svo vel á eftir, líkaminn fullur af vellíðunardópi. Ætla aftur enda er ég í stríði við spekið/spikið. Var að keyra foreldra mína á flugvöllinn, þau eru að fara í annað skiptið á ævinni til útlanda og hlakkaði ekkert smá til.Bý með Þjóðverja, þar er allt akkúrat upp á krónu. Ég hef samt furðað mig á því hvað hún notar mikinn klósett pappír, ein rúlla næstum því á dag!!! kannski er hún bara alltaf með steinsmugu, veit það ekki. Í gær var verið að reikna út símreikninginn. Við sem sagt skrifum í litla bók þau númer sem við höfum verið að hringja í, nafnið okkar við símanúmerið og dagsetningu.

Svo kemur símreikningurinn, jibbí og þá byrjar fjörið að merkja við hver hefur hringt hvað og reikna út hvað hver á að borga í símreikning. Þar sem hún er svo akkúrat í reikningum þá var hún búin að borga reikninginn í gær, búin að merkja við sín númer og var á fullu að reikna út hvað hún hefði eitt mörgum krónum í símababbl. Nú bara á ég eftir að gera það sama. Ojbarasta en skipulagt sem er af því góða.

Nú er það helst í fréttum að það er enn þá verið að tala um hinar frægu 300 miljónir Davíðs, Jóns Ásgeirs, einhver kall í London og einhver Sullenberg eða Sullenborg, ég er að verða eins og Davíð, beiti fyrir mig minnisleysi. Annars þá horfði ég á byrjunina á seinni hluta sjónavarpsþáttar um Gerifinnsmálið í gærkveldi, þar var verið að tala um plott, pólitík, og svindl sem var tengt stjórnmálamönnum og svo var sýnt inn á Alþingi þar sem Óli Jó var að tala og beitti svona álíka ræðumennsku og Davíð, skítkasti. Svo var myndavélinni beint upp á þingpallanna og viti menn þar var Lubbi/Dabbi, að hlusta og læra af þingheimi árið 1976 eða þar í kringum. Þetta var gaman að sjá, nú kannski getur maður farið á þing ef maður er nógu duglegur að hanga á þingpöllum og horfa á Alþingi í beinni í sjónvarpinu og kemur með nýja tegund af skítkasti ef hún er þá til.


Mikið að gera í því að gera ekki neitt, snýst í kringum mig, skrifa "gera lista" sem lengjast og lengjast með hverjum deginum sem líður. Það sem er svo frábært við "gera lista" er að ferðin er hálfnuð þegar búið er að skrifa hana niður, einungis eftir að framkvæma.

Vinir Dóra teygðu sig og sprikkluðu upp á sundlaugarbakkanum í morgun,,,,þeir voru að tala um það að þeir hefðu flotið svona gríðarlega vel í sundinu þar sem þeir væru úttroðnir af salti eftir sprengidaginn. Svo er annar gaur sem þeir kalla dómarann, hann syndir að ég held 50 km á dag en tekur sér pásu meðan vinir Dóra sprikkla á bakkanum og gefur þeim svo einkunn í gær fengu þeir 8.5 í einkunn en ég heyrði ekki einkunnina í morgun,,,, þetta er hið mesta snilldar samfélag þegar maður þarf ekki að vera í sama klefa um óvinsælasti stjórnmálamaðurinn minn og leiðinlegasti sjórnmálamaðurinn minn, Valla litla, hún stundar bestu sundlaugina í bænum alveg eins og ég. Ég ætla ekki að kjósa sjálfstæðið því þar tala allir eins og Davíð og stuttbuxna strákarnir hans höfða ekki til mín, Sjálfstæðiskórinn, "Dabbi segir, Dabbi segir og við segjum það líka", ég ætla ekki að kjósa framsókn því þar tala allir eins og Davíð nema með röddinni hans Dóra en þá eru bara tveir eftir sem ég veit ekki nóg um en ljúga kannski alveg eins mikið og hinir fyrrnefndu. Borgarnes ræðan ógurlega hennar Ingibjargar Sólrúnar hefur verið sögð hafa opnað skítahauginn sem flæðir um allt samfélagið í dag. Sjálfstæðismenn kenna Ingu um árásir á saklausa menn en ,,,,var hún ekki bara kræf og sniðug að opna skítahauginn? Farin að flakka um veröldina.

Vetrarspek, vetrarspek nú er ég búin að segja þér stríð á hendur Ég er búin að fitna finn það á fötunum mínum fer svona næstum því aldrei á vigt en er nú samt 77. 5 kg og þá er bleik brugðið....!!!! Er búin að taka hjólið í sátt og hleypti því út í dag, morgun, sund, umræður í pottunum bara um Davíð Oddsson og allir segja hann vera að ljúga, sérstaklega eftir Kastljósþáttinn sem ég sá ekki, hátt fall í skítinn, plamm, slettur út um allt. Veðrið kalla á mann að fara út á skíði, upp í fjall í dag kannski. Allt að gerast í hausnum á mér en ekkert í kringum hann.

Skrifa aldrei á sunnudögum, þeir eru leyndó dagar, þá geri ég hluti sem ykkur myndi ekki dreyma um að gera. Dreymdi annars í nótt að ég hefði verið blindfull, vinkona mín vildi fá lánað bensín og díesel og ég lánaði henni bensín og hellti dísel á bílinn minn! Þá allt í einu mundi ég að bíllinn minn var bensín bíll, ljóskan að drepa mig...hugsaði og hugsaði í draumnum hvernig ég gæti nú reddað þessu og vaknaði alveg þunn og þreytt í morgun. Hlustaði á Davíð Oddsson í morgun útvarpinu, maturinn rataði varla ofan í mig, maðurinn er ótrúlegur, mig langar í annan forsætisráðherra orðin leið á gríninu hans Davíðs, ofnotkun á því af honum. 300 milljónir já þær munu verða í fréttum í allan dag og næstu daga þessar 300 milljónir sem Davíð var andvaka yfir. Það átti nefnilega að bjóða honum 300 milljónir svo hann yrði góði strákurinn við Baug......og ..............

Laugardagur. Er fyrir norðan, sumar og blóm í haga, það verð ég að segja. Norðurljósin eru ótrúleg í kvöld, gul og græn yfir Húnaflóanum. Með stútfullann maga af stappikjöti og öðru góðgæti,,,allir í góðu skapi, er að hugsa margt eins og venjulega, alltaf að gera áætlanir og koma hugmyndum á gott skrið út úr hausnum á mér og inn í tölvuna. Finnst stundum framtíðin vera furðulegt dæmi sem röð tilviljana og annara hluta hafa áhrif á.

Föstudagur, jibbí. Helgin er að koma og vorið einnig.

Rop! Hátt rop. Mæli með Dalshrauni 10, lakkgrís. Keypti 2 kg af lakkgrís á 600 krónur, úfffff át samt of mikið meðan ég var að keyra aftur hingað í skólann. En sem sagt þetta var fyndin verslunarferð. Maður gengur inn gang, hringir bjöllu og þá opnast allt í einu lúga og ótrúlega gömul og lítil kona birtist sem spyr hvort maður sé komin til þess að kaupa drasl. Ég sagði bara já og hélt ég myndi fá hláturskast, horfði á frænku mína sem var með mér og er hinn mesti hláturspoki. Svo komu tveir pokar af marglitu drasli sem gott er að kjamsa á og þeir taka ekki kort þannig að muna að vera með reiðufé. Úfffff lakkgrís hann er erfitt að standast, sérstaklega þegar hann er nýr eins og þessi sem ég keypti.

Kynning á framhaldsnámi í dag í Aðalbyggingu Háskóla Íslands frá klukkan 16:00-18:00, nú á að trekkja að umhverfispælingar lið í námið, við verðum með þvílíkann básinn,allt í boði þar. Ætla í Hafnarfjörðinn í dag til þess að kaupa mér lakkgrís,,afskorinn, afganga, gallaðann....Fannar bróðir að koma í bæinn til þess að fara í tannstrekkingar, við ætlum til ömmu í kvöld í pylsur/pulsur og svo í bíó, hryllingsmyndina Hringinn. Hlakka til að sjá ömmu og fara í bíó. Svo skella sér norður annað kvöld þótt bílinn drekki bensín eins og sjúklingur þá verð ég að fara norður kíkja á liðið og skella mér á hestbak. Mun taka Guðrúnu Ósk og Fannar með mér norður, og nú er litli bróðir komin með bílpróf þannig að hann fær að keyra hér í bænum og kannski hálfa leið norður. Annars litlar aðrar pælingar í boði sem ég ætla að kynna fyrir ykkur, þið mynduð brjálast úr hlátri yfir hinum hlutunum sem ég er að pæla í .......

Ps,,,,fannst hugmyndin hans Sigga Atla snilld, að taka mynd af bumbunni á sér og setja á bloggið, mjög fyndið herra Siggi Atla.

Annað las aðsenda grein í Morgunblaðið í morgun, frá Austfirðingi sem vill Kárahnjúkavirkjun en hann sem sagt heldur því fram að hreindýrin séu norsk og heiðargæsin sé bresk og þess vegna þurfi ekkert að vera taka tillit til þessara dýra eða réttara sagt þau eiga minni rétt á tilveru sinni fyrir austan því þau eru ekki alveg íslensk, hahaha, sér er nú hver vitleysan.

Þetta segir hann Jón vinur minn um sjálfan sig, Sigga Atla og mig.

Hér kemur topp þrjú listi yfir duglega bloggara sem ég þekki:

1. Siggi Atla - alltaf fjör að lesa bloggið hans, ekkert ótrúlega mikið að gerast en skemmtilegt og oft nýjar færslur. Fær plús fyrir kommentakerfið sem virkar stundum.
2. Ég sjálfur - gríðarlegt fjör á blogginu mínu, auðvitað, ætti auðvitað að vera í 1. sæti, en ákvað að hafa Sigga þar því hann er svo veikur fyrir hrósi og hamast þá við að blogga og blogga næstu daga til að standa undir væntingum.
3. Björk - mikið að gerast hjá henni, bloggið gefur ómetanlega innsýn í sálarlíf fjallkvenna þessa guðsvolaða lands. Af hverju ætli hún skrifi aldrei á sunnudögum?

Í gær varð ég vitni að því að það er best að vera alltaf samkvæmur sjálfum sér og taka markvissa afstöðu í málunum því annars ber enginn virðingu fyrir manni eða vill hlusta á mann. Maður nokkur sem ég þekki lennti í þessu í gær fyrir framan mig og nokkra aðra. Hann gat ekki réttlætt gjörðir sínar eða rökstutt þær þar sem hann hafði ekki verið samkvæmur sjálfum sér og getur aldrei tekið markvissa afstöðu í málunum.
Þetta var ömurlegt að horfa upp á en lærdómsríkt. En nóg um prédikanir.

Glúmur Bjarkan kötturinn minn er sjúklingur heima við, borðar ekki einu sinni uppáhaldsmatinn sinn, sem er harðfiskur en hann mun verða sprækur enda er hann Hafnfirðingur, það var víst keyrt á dýrið.

Dæs, hjólið mitt er í sárum og ég líka. Allt kolfast í fjandans rassgati, missti stjórn á skapi mínu eins og naut í flagi. Teygja fór í kringum tannhjólið þar sem ég tandur hrein að koma úr sundi og svo allt fast, bögglaberateygjan fór í tannhjólið, ég burðaðist með hjólið á bensínstöð fékk þar lélegasta dúkahníf landsins og böðlaðist í þessu eitthvað, skar mig á dúkahnífnum og er öll í smurningu, missti mig alveg, ákvað að læsa hjólinu við ljósastaur, tók hjólið upp á arma mína og dúndraði því á ljósastaurinn, ljósastaurinn dó/slokknaði á honum og ég læsti hjólinu við hann, mennirnir á dekkjaverkstæðinu stóðu bara og gláptu á þetta geðvonsku skass mig mér var nú nokkuð sama, sparkaði í hjólið og æddi í burt. Næ í hjólið í dag á bílnum. Hvað kennir þetta manni? Nú bara hætta að hjóla og fara allt á bílnum og vera ekki þessi nánös að vilja ekki keyra bílinn í skólann og aftur til baka.....og ekki missa stjórn á skapi sínu þá gengur allt á afturfótunum og framfótunum, og brauðfótum

Kötturinn minn sem er maður í álögum lennti í slag í gær við villikettina sem búa upp í Draugagili, Glúmur köttur rétt komst heim og beint til dýralæknis, var þar í nótt með næringu í æð,,,þannig að ofur kötturinn er að koma til sem betur fer, því hann er einn af fjölskyldunni.

Komin í bæinn, ferðin austur var frábær, gengið um hálft Skaftafell, að virkjuninni sem er mesta stolt þjóðgarðsvarðar, bakvið Svartafoss, upp að útsýnisskífu sem er við Sjónarsker, í torfbæinn og það sem meira var við sáum þrjá hegra, ég hélt fyrst að við værum að sjá risaeðlur því þetta eru ekkert smá stórir fuglar og æpti og skrækti á Sigga og Röggu og þau föttuðu ekki neitt og ég varð enn þá æstari og misti af því að taka mynd af hegrum/risaeðlunum. Veðrið var frábært, logn og blíða. Bílinn var tekinn í gegn í skemmunni hans Sigga, ég hef að ég held aldrei eytt eins miklum tíma á ævi minni undir einum bíl og pælt í smurningu og koppum og síum og leiðslum, og rafmagni og skrúfum og róm, og vá ég ætla ekki að drepa ykkur með bílakjaftæði. En sem sagt tók fram úr mörgum á leiðinni suður, þannig að jeppinn er sprækari eftir ferðina í skemmuna. Núna tekur Reykjavík aftur við. Skaftafell er sá staður á Íslandi sem getur endalaust komið manni á óvart. Fín ferð austur í Öræfin og þessi ferð mun seint gleymast.

Ég og Ragga tókum bara fram úr einum bíl og rúðuþurkan fauk af,,,já já ég veit hefði átt að setja nýja áður en ég fór af stað en hún var alveg föst á í Reykjavík, en skakklöppuðumst út úr jeppanum klukkan 22:00 alveg þreyttar, brúmm brúmm, sáum ekkert á leiðinni, myrkrið var svo mikið þegar við vorum að keyra yfir brúnna á Gígju kvísl að það var eins og við værum að keyra úti í geymnum á þessari brú, svart tóm í kringum okkur, eins og að vera í Harry Potter. Myrkur hér er sko myrkur. Veðrið er upp á sitt besta, erum að fara í Skaftafell að labba upp að Svartafossi.

Sund í morgun, geggjað veður í dag, svona hljóðlátt veður og hreint, það verður þannig þegar snjóar mikið og það hægist á öllu, allir verða að keyra hægt og allir verða seinir í vinnuna. Hef ekki komist í sund í heila viku og þetta var frelsi...sundperrinn var mættur að góðum vana. Bílinn minn er eins og belja á svelli í svona veðri, allt of léttur að aftan þarf að þyngja hann áður en ég æði út á land seinni partinn.

Smá saga: Kona nokkur frá Akureyri var í útvarpsviðtali á Rás 2, eins og þið vitið þá er oft snjór og hálka á Akureyri og það var verið að spyrja hana út í snjóinn og hálkuna, hún sagði að það væri svo mikil hálka að hún hefði verið eins og og svelja á belli þarna úti á bílnum sínum! Útvarpsmaðurinn byrjaði að hlæja og svo áttaði hún sig og leiðrétti sig, nei hún hefði verið eins og belja á svelli.!

Mynduð þið vilja fara að nota orðið slæki, því það er snilld, slæki þýðir= feitt, ferlíki, hvalur,,,,eða einhver sem er feitur. Þetta er nú meira slækið getur maður sagt t.d. um Gauja litla.

Eitt sem er gaman af það er að fara á áhugaverða fundi og verða svo massa pirruð á þeim sem eru endalaust að spyrja fyrirlesarann, ég var orðin svo svöng að ég æddi út í miðjum spurningum á þessum fyrirlestri sem ég var á sem var um áhrif stíflna og virkjana á náttúru og mannlíf þeirra sem búa nálægt þeim.

Fimmtudagur,,,,ég er svo aldeilis hissa vikan er næstum því búin og ég er einhvern vegin bara búin að snúast í kringum hugsanir. Ég og Ragga vinkona munum skella okkur í sveitina á milli sanda á morgun, spáin er ekki góð en Öræfin heilla og svo býr vinur okkar þarna sem ætlar að sýna okkur eitthvað sniðugt út um alla sveit. En Öræfin búa yfir mörgum leyndardómum eins og flestar sveitir. Flensan sem helltist í mig í gær fór því ég fór að drekka uppleyst c-vítamín og bruddi verkjalyf eins og mér væri borgað fyrir það, flensan dó en ég lifði.

8 dagur í kvefi, vildi óska að ég kynni galdraþulu sem lætur kvef fara í rass og rófu. Nú er frábært veður og ég hjólaði í skólann, skildi rauða skrímslið eftir heima. Bílinn minn er svo stór að ég get talað um hann í fermetrum, ætla að flytja í hann og þá þarf ég ekki að borga húsaleigu. Myndin af mér og Röggu er eitthvað klikk og kann ekki að laga þetta. Því allt hverfur þegar ég reyni það, skrítið. Fúlasti tölvufræðikennari heimsins er hérna inni í stofunni, hann vill ekki hafa aðkomu fólk hér inni í tölvuverinu.

Gott, frábæra fólk,,,ég er búin að kaupa mér jeppa,,,og draumurinn er orðin að veruleika. Ég er svo montin af honum að ég svíf um á einu grænu montskýi....

Var að leika mér í smá torfærum með vini mínum og bílinn bara fer allt,,,þetta er ótrúlegt, nei enda er þetta jeppi.......jibbbbíiiiii...þetta er frelsi en dýrara að reka þetta en litla bitaboxið sem ég átti...
Hérna eru myndir af jeppanum mínum og monthausnum mér og einnig mér og Röggu, sem var með ræpu í gær.
Mynd 1
Mynd 2

Spáin hans Jóns vinar míns er svo fyndin að ég verð að setja hana hérna inn, gott fólk þetta er það sem koma skal:

Veðurspá dvergsins fyrir næstu daga og vikur hljóðar svo:
Ekkert verður að veðri og færð verður góð um land allt og lægðirnar fara framhjá lengst fyrir sunnan land. Blómin springa út og fuglar kvaka við raust. Tjaldurinn kemur að Kirkjubóli þann 15. mars og krían kemur tveimur dögum fyrr en venjulega eða þann 8. maí. Sólmyrkvi verður á Raufarhöfn í lok maí en illugaskotta missir af honum af því hún verður að háma í sig mat og drekka sig fulla og gleymir að horfa til himins. Siggi Atla lendir í óveðri þegar hann álpast næst út úr húsi í apríllok til að fara í ríkið. Hálka verður á vegi Arnars og mun hann eiga í vandræðum með ökutæki sitt sem leitar stíft eftir nánum kynnum við umferðarskilti. Sólin ofhitnar og springur í 1000 tætlur í lok júní og jörðin þeytist út af sporbaugnum í kjölfarið og fer aldrei inn á hann aftur. Í lok ágúst rekst jörðin síðan á Júpíter. Allt fer til helvítis.

Veðrið er hressandi þessa dagana, hrisstir upp í manni og gott að reka við því lyktin fýkur í burtu. Dagurinn í gær var snilld, fór í morgunmat til Valdísar, þar var bandarískur morgunmatur á ferðinni, svo fórum við í sund, allt fauk sem fokið gat í Vesturbæjarlauginni nema við því við erum slæki, Kolaportið kom mér á óvart því þar rakst ég á bækur sem ég hef lengi verið að leita að Jónatan Livingston mávur sem er saga um máv sem er alltaf að eltast við draumana sína og svo bók um Skaftafell eftir Þórð Tómasson en þessi bók er biblía þeirra sem hafa verið að vinna í Skaftafelli sem landverðir, þar eru sögur af Einari í Skaftafelli og skessunni, en skessan bjó inni í Morsárdal og var oft að hjálpa Einari í smiðjunni, en talið var að skessan hefði verið mágur Einars sem hafði strokið úr haldi sýslumanns á Kirkjubæjarklaustri, en Einar á að hafa falið mág sinn og komið þeirri sögu af stað að inni í Morsárdal byggi skessa, hitti einnig snilldar pönkara sem höfðu margt merkilegt að segja um samfélagið okkar í dag, svo fórum við að ná í barnið, og skelltum okkur í kaffi til fólksins sem býr við flugvöllinn, ja það var nú kaffi í lagi, og allt fylltist af gestum og allir töluðu og töluðu og einn kúkaði í sig, og margir hlógu. Takk fyrir kaffið griðkona, við Valdís munum taka á þér hús bráðlega aftur. Jæja skelltum okkur svo í keilu, barnið var best í keilu við hinar vorum bara að horfa á hitt fólkið og brjálæðið í keiluhöllinni minnti mig á stresshaug.


Kvef, verð að borða hollt og taka vítamín.

Það er að koma vor, finn það í loftinu, skógarþrestirnir eru farnir að syngja heldur mikið og dagurinn er farin að lengjast, sem betur fer. Hjólaði á 100 km hraða í skólann, eða réttara sagt vindurinn í bakið, og allt niður á við, sleppti höndum og reyndi að fljúga af stað en rann bara. Gæsir út um öll tún Reykjavíkur borgar,,,,þessar gæsir eru svo fyndnar. Núna er ég í Þjóðarbókhlöðunni og hér fyrir framan hana voru átta stykki af grágæsum á göngutúr á malbikinu, þær horfðu í kringum sig og stoppuðu, bulluðu eitthvað um að þær fyndu hvergi gras, svo kom ég hjólandi og splittaði hópnum, hjólaði í gegnum hópinn, hahahaha, þá varð nú handagangur í öskjunni/töskunni, vængir út um allt, gargað og öskrað, og hlegið sko ég hló, og þær hvæstu líka. Gæsir eru risaeðlur okkar tíma, eða dvergaeðlur okkar tíma, pælið í því.

Í sumar verður gaman, get ekki beðið eftir sumrinu. Farin út að hjóla með gæsunum.

hvað er ég eiginlega búin að vera að gera í dag? Ekkert, nákvæmlega ekkert!!! Það er eitthvað sem ég er ekki vön að gera,,,annað stór alvarlegt mál er það að jeppinn fjandans jeppinn er komin aftur á bílasöluna og á glænýjum dekkjum, glæ nýjum vetrardekkjum.....sem þýðir að hann kallar á mig og Kverkfjöll kalla einnig mjög hátt á mig. Er annars að drekka bjór svona rétt fyrir svefninn á morgun taka á því í heilanum, út að borða um annað kvöld og svo sunnudagurinn fer í að ferðast með tveimur ofur konum,,,,Valdísi Veru og Laufey Mattíönu, við í sund og menningarreisu kannski á Þingvöll, fer eftir veðri. Laufey er 2 ára snillingur og Valdís Vera er 30 og eitthvað ára snillingur. Snörl í nös, hóst í hálsi...Siggi Atla er sá sem kann allt og veit allt, því hann er bloggmeistarinn! Hér hafið þið það stelpur og strákar.

Nú á að taka á því nú skal eitthvað gert í dag annað en að láta sér dreyma um villtar skíðabrekkur og viljug hross sem vilja hlaupa með mann endalaust út og suður. Hoppaði allt of lítið á trampólíninu og er þess vegna frekar óróleg. Fannar bróðir fer í bílprófið sitt í dag, gangi þér vel gamli rauðhaus! Tannlæknirinn minn sem er mikið til umræðu þessa dagana, því hann er svo sniðugur var með margar spurningar út í pinnan í tungunni á mér, hann vildi vita afhverju, hvenær og til hvers? Jæja ok afhverju gerði ég þetta? Vegna þess að ég vildi athuga hvort ég gæti gert þetta og svo var þetta einnig spennandi að prófa, ég lét gera þetta í Glasgow 1998, og til hvers jah! Það er nú málið þetta gagnast manni ekki neitt til daglegra starfa það verð ég nú að segja en karlmenn sumir hverjir eru mjög áhugasamir um pinna í tungum og segja að hann bæti kynlífið, það veit ég ekkert um og pæli heldur aldrei í kynlífi því það eru allir að pæla í kynlífi ég pæli í einhverju öðru í staðinn, þið ráðið hvort þið trúið mér.

Ég ætla að fara á Raufarhöfn þann 31. maí til að fylgjast með sólmyrkvanum, ætla að sofa undir berum himmni og drekka eitthvað gott og éta eitthvað enn betra.

Kannist þið við það að þurfa að gera eitthvað, vita alveg hvernig eigi að gera það en koma því ekki í verk því þið viljið vinna undir pressu og gera eitthvað annað ???? Þetta er ég í hnotskurn,,,,,er núna búin að sitja í 3 klukkutíma og hugsa, pikka nokkrar línur inn í verkefnið en kem mér ekki í að móta það bara af því það er eitthvað svo stórt og bara. Er á fullu að hugsa um það hvað ég gæti gert í sumar, og á erfitt með að velja á milli kosta og ókosta, því ég veit ekki hvað er kostur og hvað er ókostur, humm fáranlega orðað en svona er þetta. Enginn snjór. Allir kátir og hressir, er það ekki? Er að fara í trampólíntíma, vona að það verði ekki margir, svo leiðinlegt að bíða eftir því að fá að hoppa og skoppa.

Ég er að drepast því tannlæknirinn minn sem er snillingur og ótrúlega skemmtilegur boraði og boraði í tvær tennur í morgun, mér leið hræðilega! Hljóð, lykt, kafna/ drukkna í eigin munnvatni. Reyndi að hugsa um eitthvað skemmtilegt, fann ekki neitt skemmtilegt að hugsa um langaði að rífa allt úr kjaftinum á mér og hlaupa út, svo enduðu hugsanirnar í Öskju og hugsaði bara um Öskjuvatn og fjöllin, ímyndaði mér að ég væri þar og þá gat ég hugsað mig í burtu. En er búin hjá tannsa. Engar pælingar um þjóðmálin þessa dagana. Stríð og ekki stríð. Almenningur í Bandaríkjunum er að hamstra mat, límbönd og eitthvað fleira sem ríkisstjórnin sagði þeim að kaupa, aumingja fólkið að búa þarna. Ætli Binna snillingur sé að hamstra dósamat og límbönd? Binna hvað er að gerast í U.S.A!!!!


Jæja það er komin næstum því 17. febrúar en þá verður nú gaman því yngsti bróðir minn fær þá bílpróf!!! Hann Fannar snillingur. Þá get ég farið að láta hann keyra mig út um allt þegar hann kemur í heimsókn.

Veik, kvef og hálsbólga. Var áðan á fundi með Landsvirkjun um Hálslón, vorum að ræða um mótvægisaðgerðirnar þeirra og ég veit ekki hvað annað áhugavert. Fékk mér svo besta ís sem ég hef bragðað á þessu ári, í ódýrustu ísbúðinni í bænum. Samt kallt úti en borða ís.

Skotta, skottaðist á djammið á laugardagskvöldið, það var skrítið og ekkert gaman, en var samt komin heim mjög seint klukkan 7 um morguninn. Týndi öllum einhvern vegin og fann svo alla aftur, gaman að fylgjast með fólkinu. Um klukkan 3 um nóttina breyttust allir, augun urðu eins og í veiðimönnum og veiðitíminn byrjaði. Það var mjög fyndið að sjá, strákar sem höfðu haldið sig til baka, stækkuðu allt í einu risu upp og litu í kringum sig og stelpur sem höfðu verið að kúldrast við borðin æddu út á dansgólfið í von um að verða veiddar, en ég stóð bara við barinn og drakk og glápti, og vissi varla hvað gekk á alveg eins og álfur út úr hól.


Sund í morgun, Siggi Atla ætlaði að hitta mig þar klukkan 7:00 en hann kom ekki, því hann fór út á Nes en ég í Vesturbæjarlaugina, smá misskilningur. Vinir Dóra, er sérstakur hópur sem hittist alltaf í pottunum, þar ræða þessir vinir um lands-og heimsmálin. Svo rýkur Dóri allt í einu upp úr pottinum og segir öllum að nú sé það ræs og allir æða af stað, raða sér í stóran hring og byrja að gera æfingar sem Dóri stjórnar með herforingjarödd. Illugaskotta bara glápti eins og henni einni er lagið og reyndi að drekkja sér í heitasta pottinum því það var svo andstyggilega kallt í morgun.

Það er búið að vera æðislegt veður í dag, hvasst og hressandi. Davíð Oddsson heldur áfram að vera fyndinn ég er farin að undra mig á þessum ótrúlega húmor hans, hvenær ætlar hann að hætta svo við getum hætt að hlæja af hrokanum og virðingaleysinu í honum? Hvenær talar Davíð Oddsson málefnalega um einhvern málaflokk? Ég tek ekki eftir því kannski heyri ég bara vitleysuna í honum en vill ekki heyra þegar hann talar skynsamlega. En hann spilaði sinn feita rass úr buxunum fyrir jólin þegar hann kom með þá athugasemd að það væri ekki fátækt á Íslandi og Íslendingar væru þekktir fyrir það að fjölmenna þar sem ókeypis matur og aðrar vörur væru á boðstólnum. En þetta var einmitt þegar mæðrastyrksnefnd var að gefa mat fyrir jólin og mæðrastyrksnefnd hafði aldrei lennt í öðrum eins fjölda af fólki sem bað um aðstoð. Vinkona mín býr við sömu götu og mæðrastyrksnefnd er við og hún sagði að fyrir jólin hefði verið sorglegt að ganga fram hjá röðinni sem sífellt lengdist fyrir jólin. Hún sagðist hafa passað sig að horfa ekki á fólkið því kannski væri einhver þarna sem hún hefði þekkt og hann hefði ekki viljað láta sjá sig þarna það er víst. Þetta var ekki glaðlegt eða stollt fólk sem stóð í þessari röð, engin talaði, fólk stóð og horfði á fætur sér, allir biðu einungis eftir því að röðin kæmi að þeim svo þeir gætu komið sér sem fyrst í burtu með sínar nauðsynjavörur. Það er fátækt á Íslandi.

Það er komin tími á nýjan forsætisráðherra, Davíð er búin að vera allt of lengi við völd, hann er orðin blindur og allt of fastur í sessi. Hann er eins og freki strákurinnn í sandkassanum sem fær öllu ráðið og þegar hann fær ekki það sem hann vill, þá öskrar hann þangað til allir hlýða honum, því maður verður brjálaður á því að hlusta á þessi öskur en getur líka verið útilokaður úr hópnum ef maður hlýðir ekki þeim sem stjórnar, og það er ekki gaman.

Annað í fréttum er það að ég fór til tannlæknis, Illugaskotta hatar sársauka og sársauki tilheyrir tannlæknum en þessi gaur er snilli og ekki var verra að hann er skemmtilegur. En fréttir af kjaftinum í Skottu, hummmmmm, tvær skemmdar hræðilegt!!! rífa á úr mér endajaxlana en verra!!! og tannholdið í mér er í fílu þá meína ég skítafílu, verð að nota tannþráð og þið líka sem lesið þetta því það sparar peninga að nota tannþráð, en ég var eins og vampíra í kjaftinum sem er nýbúin að fá sér blóð að drekka þegar hann var búin að rífa tannsteininnn í burtu og hamast með tannþráðinn á mínu auma tannholdi.

Sumarbústaðaferðin, ferð Norðlendinga, var farin á föstudaginn, ég og þrjár aðrar, höfum verið vinkonur frá því við vorum 5 ára. Ferðin var góð, festum bílinn, ýttum bílnum, og festum hann aftur. Bústaðurinn er staðsettur efst á hnjúk einum, og ég sagði ekki neitt en óskaði mér þess að ég hefði nú átt að vera búin að kaupa jeppa sem ég hef ekki efni á, þá var tekin ýtupása, slökkt á bílnum, myrkur og fengið sér að drekka, því við vorum orðnar svo þyrstar, bjórinn rann hratt niður. En er ekki sagt um sumarbústaðarferðir að það eigi ekki að tala um þær? Þetta var svoleiðis ferð, ótrúlegustu hlutir voru ræddir, það var étið, hlegið, drukkið, étið meir, drukkið meir, gargað, öskrað,,,,,,,,hummm nú er ég komin of langt inn í kvöldið þessi ferð var hlátur. En ég er ekki viss um hvort að eigandi bústaðarins vill fá okkur aftur inn í hann því um morguninn var svæðið eins og besti skemmtistaður og fólk lá hér og þar og alls staðar. Nei við vorum ekki að prjóna eða sauma út! Við fórum á fyllerí, ærlegt og engin varð vitni að því nema við fjórar. Jæja nú var komið að því að losa bílinn frá þeim stað sem við höfðum ýtt honum á og fengin var hjálp frá einum jeppa gaur sem kunni ekki að setja bílinn sinn í lága drifið og dróg mig næstum því fram af veginum og út í á, þá vaknaði í mér heilinn sem hafði verið dauður, ég -ætlaði ekki að enda þessa snilldarferð úti í á og stoppaði gaurinn með því að flauta á hann á meðan adrenalínið rann um allan skrokk, en allt endaði þetta vel og við komumst af stað með þynnku í skokknum og góðar minningar það er að segja þær okkar sem muna allt kvöldið hehehe.

Spakmæli dagsins: "Eigi er jeppi góður ef maður kann ekki á hann"

Tvær persónur sem ég þekki vel fóru að skoða hin nýja þingskála Alþingis, þessar tvær persónur eru vel máli farnar, klæða sig flott og eru þær skemmtilegustu sem ég þekki. Persónurnar tvær voru búnar að hlusta á listaverk sem er inni í vegnum, þær löggðu eyrað á vegginn og veggurinn talaði snilldar setningar um steina, fossa, fjöll, blóm og fugla. Svo voru þarna 5 litlir leðurstólar sem persónurnar tvær ákváðu að setjast í og spjalla um ekki neitt en samt eitthvað, því þessar tvær persónur geta talað um allt á áhugaverðan hátt. Allt í einu kemur þingvörður og segir þessum persónum að fara út úr Alþingi því þetta sé ekki staður til að sitja á þótt þarna væru 5 sætir svartir leðurstólar. En sem sagt tveimur Íslendingum var vísað út úr Alþingi því þeir voru ekki æskilegir gestir. Þingvörðurinn var ánægður með dagsverkið sitt að skófla tveimur kátum persónum út úr ríkinu sínu, þarna skildi hann fá að vera einn með fimm tóma leður stóla og geta hangið í friði á netinu að skoða hvað sem hann vildi skoða.

Trampólín, mæli með því að hoppa á tramólíni þegar þið eruð með einhver vandamál eða vantar lausn á einhverju vandamáli, maður hoppar vandamálin í burtu og lausnirnar hoppa inn. Það gerðist hjá mér í gærdag, ég hoppaði og hoppaði eins og ég ætti lífið að leysa og allt í einu skildi ég allt að mér fannst og leið ótrúlega vel. Skellti mér niður á rassinn og hoppaði aftur upp á lappirnar gaman gaman hefði getað verið að hoppa í marga klukkutíma en það biðu fleiri eftir því að hoppa sig í burtu.

Helgin er að koma! Norðlendinga sumarbústaðaferð í kvöld, fjórar orkuríkar manneskjur á leið í sveitina, get ekki beðið að hitta þær og skemmta mér með þeim eins og okkur einum er lagt. Svona ferðir eru snilld. Ég tók til alkahólið í gærkveldi, tvær whisky flöskur sko ekki að verri endanum þetta eru Chardu 12 ára og Dalwhinnie 15 ára, þessi 18 ára fær að vera heima, skoskt eðal whisky og svo fær Jack Daníels að koma með þótt hann sé bandarískur og svo kemur Ihrish Cream einnig með þannig að þessi landa blanda er ágæt, en bandaríkja gaurinn fær að drukkna í kóki því annars er ekki hægt að eiga samskipti við hann. Annars á eftir að kaupa allt annað þá meina ég nestið en það verður eins einfallt og hægt er. Svo er búið að bjóða mér í ferð í Dalina og á Strandir með tveimur snillingum og ég held ég skelli mér bara, það verður einungis talað um húsagerðir og þá frá örófi alda og fram á þann tíma þegar Íslendingar skriðu upp úr moldarkofunum og ákváðu að núna gengi þetta ekki lengur að vera manngildis moldvarpa, því það lifa ekki moldvörpur á Íslandi og nú þyrfti að taka á því og byggja almennileg hús.

Jæja hvað ætli mussulið sé? Eru það útúr reyktir hippar eða fólk sem talar í blómum og ljóðum, eða fólk sem klæðir sig eins og hippar og vill að allir séu vinir og brosir allan daginn, eða fólk sem horfir bara á eina hlið á málunum eða....ég hef bara verið að velta þessu fyrir mér?!!! Siðfræði, hagfræði, félagsfræði, eða jarðfræði? Hvort ætli virki nú best á almúgann, grálúsugann almúgann sem veit ekkert um áform stjórnvalda þegar verið er að tala um stjóriðju? Mér finnst og þeim finnst og okkur finnst en hvað á okkur að finnast um hin og þessi mál? Þar kemur aðalpunkturinn það eru viðmið okkar og gildi sem ráða því. Öfgar og sinnuleysi eru hamlandi og valda því að ekkert kemst áleiðis í málum sem er mjög mikilvægt að fólk fylgist með, þegar það eru öfgar þá fælist fólk frá og vill ekki koma nálægt málefninu og þegar það er sinnuleysi þá hefur enginn áhuga á að taka á málunum því þau eru of viðkvæm, eru of flókin og best að láta þetta ráðast.. Bla, bla ég held ég klári morgunmatinn minn og komi mér í það að gera eitthvað annað en æsa upp mann og annan. "Eigi skal höggva"

Fimmtudagar er einhvern vegin ekki dagar, bara nafnlausir klukkutímar. Komst yfir ótrúlega mörg verkefni í morgun. Er búin að borga skuldina sem ég fékk frá löggunni, 11.900 krónur fyrir að keyra yfir á rauðu og fjórir punktar!!! sem fara ekki fyrr en eftir þrjú ár. Njósnamyndavélar til fjandans með ykkur, ég má hins vegar fara til löggumannsins og skoða myndina af mér, hummm, fannst samt fúlt að fá hana ekki senda í pósti ásamt rukkuninni. Eða hvað finnst ykkur? Á maður ekki að fá senda af sér mynd sem er svona klikkaðslega dýr! Verkefni satans er ekki klárað hinsvegar, lá heima hjá Svavari vini og við reynum eins og við gátum með þykku hausnum okkar að skilja þetta en!? Kláruðum ekki þetta fjandans tölfræðiverkefni. Finnst hins vegar ótrúlega gaman að snúa kettlingunum hans Svavars í hringi á stofugólfinu og láta þá svo labba af stað....hahahhaha, þeir bara labba í hringi.

Hér kemur saga af kú:
Hann langaafi minn hann Bjarni Bjarnason frá Illugastöðum í Laxárdal í Austur-Húnavatnssýslu var sjálfmenntaður dýralæknir og vann við það ásamt því að vera bóndi á Blönduósi. Eitt sinn var hann kallaður til eins bóndans á Blönduósi því kýrin hans lá víst eins og klessa á einni af aðal umferðargötum Blönduósbæjar og taldi bóndinn að kýrin væri bara steindauð og sál hennar á leið til kúahimnaríkisins. Langaafi fór nú að skoða hina dauðu belju en sá strax hvers kyns var og sagði ": Jæja góði hún á nú við sama vandamál að stríða og þú hverja einustu helgi, þessi kú er blindfull og hefur nú drepist brennivínsdauða". Bóndi hafði þá verið að brugga í fjósinu, kýrin losnað ætt í bruggið, drukkið það allt og étið rúsínurnar sem bóndi hafði sett í bruggið til að bragðbæta það. Svo ætlaði hún í bæinn að leita sér að flottum kúa strák til þess að eiga góðar stundir með eða kannski ætlaði hún bara að horfa á sólarlagið...hehehe. Það hefði verið gaman að sjá hana böðlast út úr fjósinu. Hann pabbi sagði mér þessa sögu um daginn.

Slabb, rok, rigning,,,,er að skipuleggja mig í skipulagsbókinni minni, gengur alltaf vel að skrifa allt niður sem ég á eftir að gera en illa hins vegar að drífa alla þessa hluti af. T.d. að koma hausnum á mér í lag fyrir sumarið. Mæli með því að skrifa niður og framkvæma. Gott ráð.

Hæ og hó, ég er komin heim á klakann eina og sanna. Það er skrítið að í fyrradag var ég að strolla um á götum Kaupmannahafnar en í dag er ég á Íslandi að sveiflast um byggingar skólans. Næ engu sambandi við verkefnin og þau ekki við mig, eins og skilningssljó hjón ég og verkefnin. Slapp í gegnum tollinn með urmull af rúgbrauði, dönsku.
Er ótrúlega glöð í dag, bara gott að vera heima og skilja allt sem er sagt í sjónvarpinu við mig og einnig að skilja allt sem er sagt við mig í búðinni. Það var merkilegt að ég var stoppuð hvað eftir annað á götum Kaupmannahafnar og Danir og Norðmenn að spyrja mig hvernig þeir ættu að komast hitt og þangaði í bænum. Ég bara brosti og sagði
: " Det ved jeg ikke so godt fordi jeg er en stor tourist"! Skóli til klukkan 19:00 í kvöld og svo skella sér í sund í VESTURBÆJARLAUGINNI sem er besta laugin í bænum.

Sunnudagur, það snjóar og allir að drepast úr kulda hérna. Er að fara að fylgja Eydísi niður á lestarstöð svo heim til Bjarna aftur að skrifa pistil sem á að fara í landvarðarblaðið, ég nenni því ekki en er búin að hugsa hann út og suður, ætli hann verði ekki í lagi. Hef ekkert skoðað FRÉTTIR á netinu en ég fór frá Íslandi því ég var búin að fá nóg af öllu þar meira en nóg. Ég gæti alveg hugsað mér að búa í Kaupmannahöfn, fínt að vera þar, nóg af hlutum til að skoða, skemmtilegt fólk og stutt í önnur lönd. Vorum á Istegade í gær ég og Eydís og ég ætlaði að drepast úr hlátri þegar við vorum í einni af klámbúllunum því þar voru bara Íslendingar á ferð, ekki einn einasti annar landafjandi nema Íslendingar að kaupa hjálpartæki. En hvað vorum við að gera þarna? hehehehe ég bara legg þessa spurningu fram hér á netinu.

Ég komst í tölvu og er takka óð, eða réttara sagt Sigga Atla sagði mér að skrifa,,,,,,,hummm. Kan jeg snakke med Lars? Men jeg skal har tree pölser og ogsa bröd....pylsan kemur á bréfi. Flugið var snilld sá upp eftir öllum Noregi, snjór, há fjöll, djúpir dalir. Bjarni bró býr í bæ sem heitir Birkeröd, vinalegur bær, lítil hús og litlar götur. Skógur rétt við hliðina, göngustígar út um allt, tjarnir og fuglar. Refir eru algengir hér,,,,umm og einnig krákur. Engin dagskrá áætluð einungis að hitta Eydísi klukkan 20:00 en þá kemur hún frá Álaborg það verður svo gaman að veltast um borgina með henni. Einn sá besti ferðafélagi sem ég hef ferðast með það er Eydís, alltaf til í allt og ekkert stress. Talaði bara dönsku í dag og kom sjálfri mér á óvart. Mig langar í dýragarðinn, í hallargarðinn Hilleröd, í Kristjaníu....en ekki í Stínu á mánudaginn því þá kem ég heim og ef ég lykta af kúaskít þá verð ég tekin í garnarskoðun sem mig langar ekkert rosalega í.....hehe

Ég fer út á morgun ligga ligga lái....bara beint á barinn í fyrramálið, whisky og góð bók, sitja við barinn og hlakka til að komast í annað umhverfi, svo í flugvélina og ég verð komin til Danmerkur klukkan 12:00 að dönskum tíma. Þetta verður svo ljúft, mér líður eins og jólin séu að koma, að ég sé að fara að opna pakkana.....á samt eftir að gera allt, á t.d. að kaupa ópal og viacream fyrir eina vinkonu mína, því viacream fæst ekki í dönskum apótekum en ég held að hún sé að gera grín í mér, til að láta mig fara í apótekið hér og kaupa fullnægingar krem hehehe, þetta er að ég held bara hitakrem en hef lítið sem ekkert pælt í þessu kremi. Skemmtið ykkur hér á Íslandi ég er farin í heila 4 daga.

Góðir hálsar ég mæli með Vesturbæjarlauginni klukkan 15:00 hún er full af skemmtilegum vitleysingjum sen vilja tala um málefni líðandi stundar. Menning er sund og sund er menning. hikst og skál norska myndin Elling er snilld mæli með henni og einnig myndinni Nattevagten dönsk hryllingsmynd úhúuuu....var að horfa á Elling á eftir að kíkja aftur á Nattevagten.

Ég er þjóðfræðingur, landvörður, nemi í umhverfisfræðum, rithöfundur eða kannski réttara sagt texta eftirherma,,,,,,,,,,,hummm hvað fleira gæti ég sagt sem pappírar staðfesta? Ekkert.

Leifur stóri bróðir sá elsti á afmæli í dag, hann er fæddur 1968, það flotta herrans ár. Til hamingju með daginn Leifur gamli.

Þorramatur í gær en er svo lélegur þjóðfræðingur að ég kem eiginlega engu af þessum stórfurðulega mat niður í görnina á mér. Fékk mér einn hákarlsbita á diskinn en þegar hann fór að anda á mig þá fór ég að kúgast,,,,,át ótrúlega gott hangikjöt, kartöflur, rófustöppu, grænarbaunir og súrt hvalsrengi sem var gott. Villdýr sem ég þekki át hákarlinn minn og ég slapp við það að þurfa að kúgast. Vildi óska að ég gæti étið þennan mat sem á að vera svo þjóðlegur. Mér finnst nú ýsa með kartöflum vera þjóðlegri eða skyr með rjóma og íslenskum móa bláberjum.

Það er útkall stendur á póstkorti hér við hliðina á mér í tölvuverinu í Tæknigarði hér er tilvitnun í póstkortið "ÚTKALL!! Mætum á Austurvöll allir sem vettlingi geta valdið. Þriðjudaginn 28. janúar 2003 kl 12:00. Við viljum þjóðgarð, ekki Kárahnjúkavirkjun. Við viljum að þingmenn hafni frumvarpi iðnaðarráðherra. Það tapa allir á Kárahnjúkavirkjun"

Hux og aftur hux,,,,,krakkar, gott fólk og aðrir góðir hálsar, Hálslón verður að veruleika. Ég er búin að lesa matsskýrsluna og hún uppvísir mann um margt sem aldrei er talað um, allt slæmt myndi ég segja hvað varðar náttúruna og komandi kynslóðir já hvað munu þær segja????: "Asnar voruð þið að fórna þessu landi, eða vá ef við hefðum ekki fórnað þessu landi þá værum við sko ekki með svona góðan efnahag" Engin veit hvað komandi kynslóðir munu segja. En Landsvirkjun er ekki hætt störfum þótt Kárahnjúkavirkjun sé að verða að veruleika enda fyrirtæki í örum vexti og nóg er af auðlindum til að virkja, þar á meðal Torfajökulssvæðið þar sem Landmannalaugar eru, það væri nú munur að fá malbikaðann veg út og suður um Torfajökulssvæðið og þá væri fjör að vera túristi og skoða stóriðju og náttúru í stuði, einnig fer Langisjór undir virkjun, eitt besta upptistöðulón sem Landsvirkjun hefur hitt, bara að veita Skaftá inn í hann og svo Þjórsárver, það skiptir engu máli með þau, því Norðlingaölduveita er ein sú ódýrasta víst í framkvæmd, þetta er nú bara friðland og Ramsarsvæði. Ramsarsvæði þýðir að þetta sé votlendi sem er talið mikilvæg á heimsvísu og mikilvægt búsvæði fugla og plantna og friðland að þetta sé mikilvægt svæði hvað varða náttúrufar og sögu.

Ég verð geðveik ef ég pæli meira í þessu. Ætla að brosa og vera kát í dag, þótt það sé eitthvað sem er erfitt í dag, er ekki í góðu skapi, leið , gott að skrifa það bara hér og þá fer leiðinn inn í tölvuna.

Jón Jónsson Strandamaður og Kirkjubóls fræðabóndi skrifaði þetta í gestabókina mína um ísbirni og ég varð að setja þetta inn því þetta er snilld,Jón sagði:
Hérna fyrir norðan göngum við alltaf í úthverfum fötunum af ótta við ísbirni. Þegar maður hittir ísbjörn flýr maður til bæja, en hendir einni og einni flík af sér. Þá stoppar ísbjörninn á meðan hann snýr flíkinni við af því hann þolir ekki úthverf föt. Þetta fannst mér flott og ég Illugaskotta trúi því að það sé best að búa á Ströndum því þar er örugglega oft fullt af nöktum karlmönnum og líklega einnig kvenmönnum á hlaupum um fjörur og sveitir, hehehe. en ég myndi aðallega horfa á karlmennina. hahaha

Mánudagur, var komin til Reykjavíkur klukkan 21:00 í gærkveldi hefði verið til í að vera fyrir norðan í svona fimm daga í viðbót, bara fara á hestbak og njóta þess að vera í tímaleysinu fyrir norðan. Þarf að hamast í verkefnum því Illugaskotta er að fara til Danmerkur nánar tiltekið Kóngsins Kaupmannahafnar á fimmtudagsmorgunn, 30. janúar, það verður gaman að hitta Bjarna bró sem ég hef ekki séð í heilt ár og anda að mér dönsku lofti, borða pylsur/pulsur og drekka bjór. Það sem mér finnst hvað merkilegast við Danmörku það er það að ég þyngist alltaf þegar ég fer þangað, veit ekki hvað það er við þetta land en allt er bara svo gott þar. Farin að lesa.

Ég er á Blönduósi í tímaleysi, hér er logn, snjór, frost og sól. Í morgun skreið karldýr inn um gluggann minn og upp í rúm til mín. Þetta karldýr er svart með hvítartær og malar ótrúlega hátt, hann kemst upp með allt og ef ég vissi ekki betur þá myndi ég segja að hann væri maður í álögum sem kötturinn Glúmur.
Í dag fór ég í hesthúsið, gaf öllum að éta hrossum og kindum, og tvær litlar en duglegar búkonur komu einnig með mér, og voru alveg móðgaðar við mig þegar ég var að segja þeim hvernig ætti að vinna verkin í hesthúsinu, þær sögðust oft hafa gert þetta og snéru upp á sig, mér fannst þær fyndar þar sem þær voru að tala við kindurnar og gefa þeim um leið að éta. Guðrún Ósk frænka mín er önnur búkonan og hún kom með mér á Blönduós, hún er 9 ára og er búin að vera úti í allan dag. Núna eru hún og vinkona hennar að hoppa í skurðina því ég sagði þeim að það væri mesta fjörið þegar þeir eru fullir af snjó og einnig eru þær að fara að renna sér í brekkunni sem er fyrir ofan hesthúsið okkar. Guðrún Ósk vill hvergi annars staðar vera en á Blönduósi en það eru ekki allir sammála henni í því. Nú sést vel út á Vatnsnesið og Strandafjöllinn, en það besta við Húnavatnssýsluna að mata sumra Strandamanna er útsýnið á Strandafjöllinn. Ég. Læt þetta ekki vera lengra, ilma af hesalykt og ætla að drífa mig í bað.

Kæru karlmenn sem lesið þessa bók: Gleðilegan bóndadag og verið nú kátir í dag. Þið vitið að þið áttuð að hlaupa í kringum húsið ykkar einungis íklæddir annarri buxnaskálminni.!?
Langar ekki til þess að tala mikið í dag. Kaffið er ofur á Kaffivagninum, gaman að horfa á bátana og hlusta á fólkið. Þorrinn er genginn í garð, fer á skíði á mánudaginn með Önnu Fanney og Oddi stráknum hennar sem er 6 ára, hann er ótrúlega sniðugur strákur og klár. Hann hefur mikinn áhuga á ísbjörnum og byssum. Við ræddum mikið um ísbirni um daginn og hvernig maður getur komist hjá því að þeir éti mann upp til agna þegar maður er sofandi í tjaldi úti á ísnum á norðurheimskautinu. Það lifa bara mörgæsir á suðurskautinu og bara ísbirnir á norðurskautinu, því fyrir ævalöngu gerðu þessi dýr samning sín á milli um að skipta á milli sín þessum heimkynnum því þau geta ómögulega búið saman eins og fleiri sem ég þekki.

Frost, skafrenningur og ég hjólaði í skólann. Hélt ég myndi hálsbrjóta mig, bakbrjóta mig og allt, rann af stað í hálkunni og reddaði mér með því að hjóla út á grasið frábæra, lífsbjörgin mín er grasið í dag. Úff fraus á fingurgómum, rassi, lærum og er hér í tölvunni með sjóðandi putta, rass og læri. Úfff en tærnar eru frosnar....en sem sagt hvað er að gerast í þjóðmálnum, aðeins smá fyrir Binnu. Já best að byrja þetta á því að segja. Sko hann Davíð Oddsson er fyndinn eins og alltaf á Alþingi en mér virðist sem svo að þingmenn séu orðnir frekar leiðir á honum bara hlæja því það er skylda að hlæja af engum svörum en Davíð Oddsson er bestur í þeim.,,,,,,, Nei vil ekki skrifa um þjóðmálin þau eru leiðinleg. En það voru flottar myndir í fréttunum í gær af selum, sem eru í húsdýragarðinum, þeir eru eins og hundar með veiðihár, kát augu og sniðug eyru.
Farin að lesa um hörmungina Kárahnjúkavirkjun því ég er að fara að gera verkefni um mótvægisaðgerðir gagnavart rofinu sem mun verða við Hálslón sem er álíka stórt og Reykjavík, sko lónið.
Binna hér eru vefsíður um virkjunina. karahnjukavirkjun.is, lv.is.

Miðvikudagur og nóg að gera sem er gott. Kallt úti sem er einnig gott. Illugaskottu finnst frábært að prufa sundlaugar, prufaði laugina úti á Seltjarnarnesi í morgun það er saltvatn í henni, fínir pottar og það sem meira er ekkert fólk, júhú!!!! Mikið að gera í lífinu við það að hitta fólk sem ég sé allt of sjaldan. Ég er búin að koma mér upp kerfi ég ét bara þegar ég fer í heimsóknir og þá þarf ég aldrei að kaupa mér mat bara sýna á mér smettið segja eitthvað skemmtilegt, heimskulegt, gáfulegt og borða..... Fór í frábæra pizzuveislu í gærkveldi hjá Röggu og foreldrum hennar. Sá sérstaklega fyndna og skemmtilega frétt um skapalón í fréttunum í gær, thí thí. Fríða þetta er eitthvað fyrir þig! En nemendur Háskóla Reykjavíkur í tölvum og Listaháskóla Íslands fóru að vinna saman og til urðu alls kyns skemmtileg verkefni. Þar á meðal skapalóna boxið sem inniheldur rakvél, eitthvert form sem fólk vill hafa á skapahárum sínum, t.d. hjarta, blóm eða ég veit ekki hvað.....en þessi frétt vakti hjá mér hlátur, get ekki sagt annað.

Er að hugsa um að koma mér út úr bænum um helgina, sé til.

Er í skólanum til 19:00 er að sofna vil byrja snemma á morgnana og hætta um miðjan dag, enda er ég að skrópa núna.

Vill að pistillinn minn birtist, akabradabra!!!!

Labbaði í skólann, það var æði. Það eru sárfættar og frosnar blöðkur út um öll tún, grágæsirnar eru að frjósa á blöðkunum en þær kunna ráð við því var að fylgjast með þeim á Háskóla túninu, þær liggja bara og éta í kringum sig! Kom við á bóksölunni ætlaði bara að kaupa eina bók en er búin að kaupa þrjár bækur í dag. Fyrstu bókina keypti ég klukkan 10 í morgun hjá henni Dagnýju Bergþóru, bók sem hún gerði. Austfirskar útilegumannasögur mér líst vel á þessa bók og hlakka til að lesa hana. Tilvitnun í formála Dagnýjar:" Útilegumannatrú var útbreidd um allt land og kom fram í aragrúa sagna af útilegumönnum. Greina má milli þriggja mismunandi gerða útilegumannasagna: örnefnasagna, sagna af sakamönnum sem flýja í óbyggðir og leggjast út og sagna af samskiptum útilegumanna og byggðamanna."
Á bóksölunni sjálfri keypti ég bókina Láki, sem er um Láka jarðálf, hér er tilvitnun úr bókinni :"Á hverjum morgin þegar Snjáki og Snjáka vöknuðu þá sögðu þau:" Við ætlum bara að gera það sem er ljótt!" Svo kysstu þau Láka litla og sögðu:" Þú átt bara að gera það sem er ljótt. Þá verðu þú reglulega stór og ljótur jarðálfur, alveg eins og pabbi þinn."
Þetta finnst mér snilld!! og svo keypti ég eina bók sem fjallar um sögu mannsins á jörðinni í tengslum við umhverfið, hvernig maðurinn hefur haft áhrif á umhverfið sitt, virðist vera áhugaverð en hún heitir ef einhver hefur áhuga Something new under the sun Já flott bók fjallar mikið um vatn, loft, jarðveg, sjóinn....hummm. Tilvitnun í umhverfisbókina :"At the beginning of the twentieth century, humankind in the West already become aware that its collective economic activities were doing strange things to the environment. Salomon could no longer migrate upstream through chemical-tainted waters. Bölsýni, staðreyndir.....sannleikur....já líklega allt þetta þrennt í einum graut, stórum grjónagraut með rúsínum.

Frönsk kvikmyndahátíð er núna ætla að kíkja á eina mynd á morgun, ég er að hugsa um að kíkja á mynd sem fjallar um dreng sem vill ekki flytja frá foreldrum sínum 28 ára klikkhaus sem vill búa hjá þeim, ég flutti af heiman 16 ára og langar að sjá hvernig þetta virkar í kvikmyndum að búa svona lengi í fyrsta hreiðrinu. Skítugt og vel kannað hreiður það...

Ég át 6 pylsur í gær sem voru fylltar með osti, eldaði heima hjá Sigga Atla og ég, hann og Maggi átum svo saman, hux um að gera þetta að vissum passa á mánudögum að koma heim til Sigga Atla elda eitthvað og borða svo heima hjá honum. :) hehehe, það finnst mér sniðugt. Siggi þú ert snillingur!

Jæja - þá er ég komin gestabók á bloggið mitt, svo nú mega bara allir skrifa og samfagna mér.
Allir saman nú!

Mánudagur, ég kom öllum pappírum á hreint í dag varðandi umsóknir og önnur leiðindi...frelsi að vera búin með þetta og koma þessum pappírum á sinn stað. Mánudagar í lífi Illugaskottu eru helgaðir öllu öðru en umhverfinu, ég er farin að safna efni í nýja bók og einnig lokaverkefnið mitt. Mánudagar eru grúskdagar, var á þjóðdeildinni í dag, grúska og leita að heimildum í handritasafninu, og viti menn ég þjóðfræðingurinn var búin að gleyma hvernig átti að skrifa inn leit á handritaseðlana. Maður fer sem sagt í bók sem heitir Lyklar, þar finnur maður t.d. galdrar þeir eru númer t.d. 1509 og ég skrifaði það bara á handritabeiðnina, nei maður á þá að fara í bók og finna fyrir hvað 1509 stendur fyrir þar kemur fram hver skrifaði, hvenær, hvað handritið innihaldi og hve gamalt handritið sirka er. T. d. Lsb 345, 8vo. Landsbókasafn, númer, stærð handrits. Merkilegt að tína þessari vitneskju. Þessi lykla bók býr yfir ótrúlegri vitneskju ef svo er hægt að segja um bók. Rólegt og gott að vinna á þjóðdeildinni. Frost og hálka í dag, gott veður.

Fór niður á Umhverfisstofnun hitti ekki neinn með viti myndi ég segja, húsið er gamalt og ekki eins fínt og Náttúruvernd var nýbúin að flytja í. Ég verð að segja að ég er á móti þessari sameiningu, því náttúruverndin hverfur einhvern vegin og markmið hennar inn í kjaft annara stofnana.

Ég keyrði yfir á rauðu á laugardaginn og myndavél löggu spöggunar tók mynd af mér, ákvað að keyra aftur yfir á rauðu strax til að hefna mín, fáranlegt að vera svona stjórnlaus. Og ræddi svo við Iðunni um þetta, ok ætlum að mála bílnúmerið svart og keyra aftur yfir og brosa breytt með trúðagrímur.ulllll.


Illugaskotta er búin að panta tíma já panta tíma hjá þeim sem hún hræðist mest í öllum heiminum ásamt rafmagni og flugvélum, ég er búin að panta tíma hjá tannlækni,!!!!!! og hún er skít- spennt og skít- hrædd, við sársauka og reikninga,,,,og á að fara til hans 4. febrúar daginn eftir að ég kem heim frá Danmörku og konan sem tók niður pöntunina vildi nú fá að vita kennitöluna því við erum bara kennitölur og viti menn hún var svo hress að tala við mig því við eigum afmæli sama dag, 16. apríl.....hún var alveg hress og fyndin þessi kona. Er að deyja úr hungri farin í át og sund og svo er bjórkvöld hjá umhverfisfræðinemum í kvöld.

Nenni varla lengur að leita mér að jeppa en fylgist vel með því sem er verið að auglýsa.....

Ætlaði ekkert að skrifa um helgina en er komin í tölvu og þá skrifa ég....er að vinna í umsókn til að fá að kynna bókina mína í Kanada og einnig að vinna í öðru plaggi sem kemur fyrrverandi Náttúruvernd við núverandi Umhverfisstofnun. Frí á morgun í hausnum og ætla að brasa eitthvað með þessari handleggsbrotnu. Ég og leikkonan og söngkonan fræga sátum í öllum pottum Vesturbæjarlaugarinnar í 2 1/2 klukkutíma í gær! Ræddum lands-, heims- og persónuleg málefni. Fórum svo í frábæra búð, blómabúðina Blómaval. Þar eru risa páfagaukar sem flauta á mann þegar maður snýr bakinu í þá, einnig er hlýtt þarna eins og í hitabeltislandi, keyptum og keyptum plöntur. Lára keypti nú meir en ég, ég hanna allt í kringum mig þannig að ég sé alltaf að flytja og það lætur mig kaupa sem minnst, keypti þó plöntu sem mig hefur lengi langað í Aloe Vera plöntu sem er komin á skrifborðið mitt. Hver maður ætti að eiga svona plöntu því gott er að nota safann úr henni á brunasár. Þá tekur maður blað af henni, opnar það, leggur á brunasárið og lætur vera á brunasvæðinu. Sviðinn hverfur.

Ekkert annað markvert í gangi, fólk í kringum mig virðist almennt vera hundfúlt og leiðinlegt. Allir að drepast úr fílu eða kannski er það bara ég?

Kallt úti og það er æði, ég er í lopapeysunni minni og mér líður svo vel með þennan kulda að það er ótrúlegt. Það er að koma skíðasnjór og mig langar að læra á snjóbretti, er hörmuleg á skíðum en fer samt á skíði því mér finnst það svo gaman. Hálka úti, ég hef komið þessum vetri af stað. Búin að tala um það í allan vetur að þetta sé þvílíki góði hjólaveturinn, jæja ég flyt í hlíðarnar og tek hjólið mitt fram og viti menn veturinn kemur eins og ég hafi ákallað hann með hjólinu mínu. Hjólinu hans Sigga Atla vinar míns var stolið, aumingja Siggi, það er svo fúllt þegar það er stolið frá manni hlutum. Hvar er Blámi þinn Siggi? Ég vona að sá sem stal því sé búin að detta illilega á því í hálkunni og meiða sig vel. Farin í sund þótt seint sé, frýs og það er svo gott að frjósa á sundlaugarbakkanum og stökkva út í til þess að þiðna, mana sig svo upp í það að fara í heitasta pottinn því hann bítur mann í skinnið. Eigið góða helgi.

Hafið þið lennt í því að fólk fái símann ykkar lánaðan? Mér er ekkert sérstaklega vel við það að borga símreikninginn fyrir aðra en lánaði símann minn í dag, hann hvarf í allt of langann tíma og ég saknaði hans. Næst þegar ég verð spurð hvort hann eða hún geti fengið að hringja þá ætla ég að segja nei eða viltu þá kaupa fyrir mig kaffi og snúð í staðinn! hehehe nánös get ég verið. Nánös hvaðan kemur það orð? Elsku Landsvirkjun ég vona að allt gangi vel hjá ykkur í náinni framtíð við það að skemma náttúruna. Takk!

Ég fór í ráðhúsið í dag, var á pöllum en var alveg kurteis, hlustaði á borgafulltrúa og grálúsugann almúgann púa á sjálfstæðismenn en klappa fyrir hinum sem eru víst vinstri sinnaðir. Leiðinlegar ræður, leiðinlegt fólk engin spenna, allt of langar ræður, allt of mikið verið að segja það sama. Hvar er mottóið skemmtilegt krakkar???!!!! Eða " verum eins sniðug og við getum svo allir taki mark á okkur krakkar"
Veit það ekki maður, þusa bara hér á netinu um þetta mál.

Snjór, snjór, gleði, bros og hamingja!!!! Bílasalinn var svo fúll út í mitt móðgandi tilboð að hann hringdi ekki einu sinni í mig. Ætla að hækka mig um 20. þúsund krónur í dag. Þá er gaurinn að fá 500 þúsund fyrir þennan öfga gamla jeppa. Einu sinni hélt ég að þegar ég yrði 20 ára að þá mynd ég hætta að fá bólur, beið öfga spennt eftir þessum merkis bólulausa degi en hvað haldið þig eftir tuttugasta afmælisdaginn minn þá bara breyttist þetta ekki neitt, þær koma alltaf jafn glaðar á mitt broshýra smetti og nú get ég sagt að eftir eitt ár hljóta þær að hætta að koma en þá verðu Illugaskotta þrjátíu ára gömul 30 ára, skrítið.. Ég lýsi hér með stríði á hendur bólna, en bólur eru ekki með hendur þær eru með vibba. oj. Ein vinkona mín er svo skipulögð að í gær sýndi hún mér stundatöfluna sína fyrir lífið, hún gerir vikulegt lífsskipulag, lífið eftir vinnu og í vinnunni, setur inn það sem hún ætlar að éta og hvað hún ætlar að horfa á í Tv og hverja hún ætlar að hitta, ég vildi að ég gæti þetta en ég yrði sturluð að vita alltaf hvað ég væri að fara að gera þótt það myndi gera hlutina einfaldari.

Já Illugaskotta fór á fundinn í gær, og fékk meira að segja sæti, tók sæti af einhverjum sem vissi ekkert um málið og einhverjum sem hefði frekar átt að sitja þarna. En flott dagskrá, salurinn sprakk af fólki, Mynbandið var listilega unnið og allir einhvern vegin já hvernig voru allir einhvern vegin?Fólk er leitt, reitt, undrandi á því sem er að gerast en fyrirgefið mér þetta er búið að vera á teikniborðinu í mörg ár! Búið að kynna þetta fyrir mörgum árum, Björk ekki vera svona fúl!!! Segii ég við sjálfan mig, bara finna mér jörð á Ströndum þar get ég verið í friði með selunum sem eru feitir og geta leikið sér allan daginn og étið allan daginn.

Frost úti og mig langar að sofa úti í sveit í nótt. Bauð áðan í rauðu tófunna, bílinn sem mig langar gríðarlega hræðilega mikið í. Hlynur og ég fórum á rúntinn, jú fínn bíll sagði bifreiðaskoðunin Hlynur. Bílasalinn sagði að gaurinn myndi ekki vilja mitt tilboð, þá sagði ég bara að mér væri nokkuð sama það væri til nóg af öðrum bílum til að bjóða í og ég færi bara eitthvert annað. Þá vildi hann hringja í gaurinn sem á jeppann en þeir eru vinir. Er að bíða eftir svari við tilboðinu og held það verði nei en það skiptir mig ekki máli.

Bílasalar eru furðulegur þjóðflokkur

Baráttufundur á morgun fyrir Kárahnjúka svæðinu en mig langar barasta ekki baun!!! Afhverju ætli Illugaskottu langi ekki baun í bala á þennan fund, já látum okkur sjá er það vegna þess að hún er búin að gefast upp! Eða einfaldlega vegna þess að með því að mæta ekki er ég bara félagsskítur ársins á suðurhluta landsins og er alveg sama um þetta mál og bara vil láta hlutina fara eins og þeir eru að fara??.
Nei, Illugaskottu finnast málsvarar umhverfisverndarsinna ekki málefnalegir, ekki traustvekjandi og ekki skemmtilegir, ekki koma vel fram og ekki tala rétt. Skoðana kúgun stjórnvalda minnir mig á bíó mynd um Rússland í gamla daga, sjálfstæðismenn minna mig á einn heila sem Davíð stjórnar, hálendisumræðan er komin út um víðan völl, þetta er allt of seint, eins og ég hef áður skrifað allir vakna of seint af blundinum ógurlega.!!!!
Í stuttu máli sagt þá er ég orðin hundleið eða hestleið á þessu öllu saman. En með því að mæta er ég að sýna stuðning minn við málefnið segir fólk við mig, já hux og hux, ætla að huxa málið með x-i.
Kannski segir borgin nei og þá!!! hvað þá kæra og fella úrskurð borgarinnar svona finnst mér þetta hafa gengið, kært og úrskurður felldur og Landsvirkjun heldur sínu striki því hún bara kærir.

Ég hefði getað gert meir hugsa ég en hvað!! Gæti talið upp endalaus atvik sem myndu gera hvern mann agndofa og brjálaðan úr leiðindum.

Ég er í tíma í dag sem heitir "Mat á umhverfisáhrifum framkvæmda" og gaurinn sem er að kenna mér er einn harðasti virkjunarsinni landsins! Hann gerir hlutina svo einfalda sem búið er að tala um að séu slæmir, ég er að falla á þeirra hlið. Nei, en rökin hans er ótrúleg hann er eins og sölumaður kölska þarna upp við töflu. Dregur úr öllu og segir að þetta verði allt svo snyrtilegt og smart eftir virkjun og þetta séu nú allt ýkjur og bla bla bla bal bal, bla og allir lifðu hamingjusamur til æviloka.

En þótt ég mæti ekki í kirkju þá þýðir það ekki að ég sé trúlaus og þótt ég mæti ekki á fundinn á morgun þá þýðir það ekki að ég sé búin að gefast upp.

Gleymdi að segja að ég átti frábæran dag í gær. Flytja meira dót á nýja staðinn, fór að æfa mig að skjóta með efnafræðingnum óstöðvandi, hann vildi ekki hætta að skjóta fyrr en ég væri búin að læra þetta en skapið rauk af stað, ég pirraðist og sá það fyrir að ég myndi aldrei geta bjargað lífi mínu með þessu hátterni, róaði mig og ákvað að nú yrði ég að læra að miða almennilega og það tókst sem var frábært. Hittum furðumenn í gryfunni sem voru með heimatilbúna byssu sem skýtur kartöflum hátt upp í rassinn á guði. Nota hársprey við þessa iðju, takka af gasgrilli, púmmm. Háaloft fann þar bókina "Helgi skoðar heiminn" sem er ein besta bók allra tíma eftir Njörð P. Njarðvík, Örvar fékk bókina, sund, hamborgari óhollt en gott,,,,heim hitti meðleigjandann í fyrsta skipti og sofnaði vel eftir frábæran dag.

Annað var að ganga um í peysufötum og steinbítsroðsskóm allan laugardaginn ásamt þremur öðrum konum, við vorum í Fljótshlíðinni. Skemmtilegur dagur með fólki sem ég hafði ekki hitt áður, já verð að segja að fólk er ,,,,,,,,sniðugt þótt það sé oftast fífl.!!!

Illugskotta er skotin í bíl, rauðum og traustum jeppa sem gjörsamlega lætur mig fá í hnén, magann og hausinn. Þessi bíll þýðir frelsi til þess að hoppa og skoppa um hálendið, hálendið sem er undir árás frá auðvaldinu og stóriðjunni, er búin að hugsa um bílinn alla helgina og er að fara að bjóða í hann í dag eða á morgun, það er hægt að sofa á pallinum á honum, ofur græjur í honum, flott lakk, bara fínasti jeppi sem hver maður ætti að vera ánægður með. Ég bara spyr, hafið þið verið skotin í bíl?

Það eina sem ég er búin að borða í dag er klór og eitthvað annað blönduð vatnsgusa úr Vesturbæjarlauginni, kúgaðist og ældi næstum því á eina perrann í lauginni sem er ótrúlegur hann reynir alltaf að rekast á mann hvar sem maður er í lauginni, greyið maðurinn er eins og stefnulaus bauja sem einungsi rekst á kvenkyns einstaklinga í lauginni! Langar í AB-mjólk og banana en át ekkert áður en ég hjólaði af stað í morgun í sund. Það eru oftast eða alltaf einhver vonbrigði í hvers manns lífi og mín vonbrigði í þessum mánuði eru þau að ég týndi uppáhalds hringnum mínum sem ég keypti á Orkneyjum, sérsmíðaður á mig. Kannski er hann í Fljótshlíðinni á fingri huldukonu eða tröllkona nokkur hefur hann í keðju um hálsinn, það eina sem eftir er af honum hjá mér er far á baugfingri. Sem er kannski ekki allslæmt, ég hugga mig við það þegar ég týni hlutum að einhver annar geti notað þá betur en ég, því ég er alltaf að týna hlutum. Ekkert bögglabera bögg meir hann er kolfastur á hjólinu núna. Fer bráðum til Kaupmannahafnar að heimsækja litla bróður sem er að standa sig vel í Köben, hlakka til að skoða mig um og skemmta mér þar.

Eftir að fara í sund, er ekki vöknuð, skítugt hár, stírur, ekki hugsa bara vera. Farin í endurvakningu=Vesturbæjarlaugin.

Hjólabögglabera bögg!!!! Ég í Brynju þar skrúfa og rær, ég skrúfa og róa. Hjóla af stað skipti um gír, skrúfan of stór rekst í keðjuna, ég öll í smurningu á miðjum Laugaveginum hennti hjólinu til og frá þegar ég var að reyna að rífa keðjuna þar sem hún sat föst á milli tannhjólana! Ég er brussa og klúðrari, hjólaði til Elísabetu, fékk þar að þvo af mér smurninguna, húsið þeirra er já hefur tekið hamskiptum,,,er eins og sumarbústaður, flottur sumarbústaður.

Hef verið að velta fyrir mér hvað það sé að vera vinur og eiga vini. Ekki komist að niðurstöðu. Ég á tvo hópa af vinum, æskuvini og þá sem ég hef verið að kynnast síðan ég flutti í bæinn. Maður þarf að rækta vini sína, heimsækja, gefa gjafir og passa sig einnig að hanga ekki of mikið með þeim, þá verða þeir þreyttir á manni og maður á þeim. Einnig eiga þeir að gagnrýna mann og hlæja af manni og með manni, rökræða við mann, leiðbeina manni en ekki taka ákvarðanir fyrir mann, einnig eiga þeir að skilja þegar maður hefur ekki tíma fyrir þá. Kærastar/kærustur koma og fara en vinir eru að eilífu. Ekki sofa hjá vini þínum þá fer allt í rugl og allir missa stöðu sína og skilja ekki neitt í neinu og reyna að fara til baka en það er ekki hægt því staðan er komið annað. Þeir eiga ekki að dæma mann ef maður gerir mistök, bara já þessi mistök voru höldum bara áfram að vera eins og við erum. Læra um vini getur maður farið á svoleiðis námskeið í Háskólanum? Eða taka próf í því að vera ráðherra, forsætisráðherra, forseti....bla jæja kemst ekki lengra í þessari vinapælingum finnst ég hafa farið eitthvað út af veginum út í móa og er að krafsa mig aftur inn á veginn, skemmi allt í kringum mig, tæti upp jarðveginn en ég er að komast upp á veginn og þá er hægt að halda áfram út og suður sem mér er einni lagið.

Gulrætur, ég Illugaskotta er að éta gulrætur eins og kanína. Einhver sagði mér að ef maður étur ótrúlega mikið af gulrótum þá verði maður gulur á bjórinn best að verða ekki gul á bjórinn.
Sudda matur í gærkveldi ég og Ragga átum eins og gylltur í stíu. Ég eldaði og bauð henni í mat því hún þykist vera handlama, ég er viss um að hún er ekkert úlnliðsbrotin hún vill bara komast upp með það að láta þjónusta sig daginn út og daginn inn. Er það ekki Ragga? Ég eldaði sem sagt 4 hamborgara, franskar og það var nú alveg fullt af hollum næringarefnum með þessum hamborgurum, t.d. gúrkur og kál og ,,,,,tómatsósa má ekki gleyma tómatsósunni. En ég hef alltaf sagt að ég sé 178 cm því ég er alin upp á tómatsósu, Hunts tómatsósu.

En vonbrigði dagsins í gær voru þau að ég ætlaði að kaupa lás á hjólið mitt, bögglabera og hjólatösku. Ok ekkert mál að finna lás, svo keypti ég bögglabera en hjólatöskur er á verðinu 8000 til 18. þúsund!!!! hummm afhverju?! Eru þetta umhverfisvænar töskur með svo sjaldgæfum efnum í sér að þessi efni fást einungis í einu landi í heiminum sem er með takmarkaðar samgöngur og mjög dýrt vinnuafl!!! Skil ekki hjólatöskur.
En keypti bögglabera og svo þegar ég var með hjálp Röggu að pæla í honum, samsetningunni og öllum skrúfunum þá sá ég að aðalskrúfan var bara ræfill sem komst varla í gegnum höfuðgatið á hjólinu....þannig brettlaust hjóla í dag, kaupa skrúfu og pirrast í þessu í dag þegar heim er komið.
Gaman að vera til, ég er víst heppinn að vera ung með hraustan skrokk það sagði einn gamall gaur við mig í pottinum í morgun. Best að rækta sál og líkama.

Sana corporis sana sola. Rómverjar/ Heilbryggð sál í hraustum líkama.

Vesturbæjarlaugin rúlar! Fór samt aðeins of seint í morgun og lennti í sundkennslu og gamla manna öldu, skellti mér þá bara í pottana og hefði ekki getað byrjað daginn betur, þetta lið fólk yfir 60 ára er fyndið, bara fyndið. Einn gaurinn var að gagnrýna hönnunina á veggjunum í kringum laugina sagði að veggirnir væru svo nálægt pottunum að sólin kæmsti aldrei að í pottunum og að þessi gaur sem hefði verið að smíða þetta hefði nú bara ekki hugsað neitt með hausnum, ef hann hefði verið að hugsa eitthvað þá hefði hann líkalega bara komist í það að hugsa með rassgatinu! Og svo bara rætt um daginn og veginn, ullarbrækur sem eru víst alveg agalega lekkerar og eru prjónaðar af konu á Hvammstanga sem gömlu gellurnar eru mikið í og svo um ungar stúlkur sem eru að ræða málin í pottunum t.d. tvær sem voru víst að ræða um þegar önnur þeirra fór til læknis og hún var víst brókarlaus þegar hún fór til læknisins og vildi víst sjarmera lækninn eitthvað en hann skammaði hana bara fyrir að vera svona fáklædd,,,,,,,, og gömlu gaurarnir hlusta á allt sem við segjum stelpur, muna það....hahahaha

Farin í skólann, hann byrjar víst í dag, umhverfisefnafræði (tossa kúrsinn minn) og mat á umhverfisáhrifum byrja á sama tíma og ég er í báðum þessum kúrsum,,,,,best að vera snögg á milli.

Mánudagur, það sem ég er ekki búin að gera í dag, og á eftir að gera fullt í viðbót. Hringt í mig í gær, virkjunarandstæðingar elta mig á röndum, vilja mig á fund!!! Ég hata fundi.
Sagði að nóg væri komið af baráttufundum, ljósmyndum, væmnu kjaftæði, það þyrfti að gera eitthvað með höndunum. Fer kannski í kvöld, fullt af fólki þarna en afhverju í andskotanum er þetta fólk að vakna núna af þyrnirósarblundinum blíða!!! Þetta er allt of seint góða, yndislega og frábæra fólk! Það á að finna skít á Impeglione bla fyrirtækið, sem eru Ítalir eitthvað, gamlir uppþornaðir mafíósar, en þessi fjandans virkjun er búin að vera á korti Landsvirkjunar í mörg ár og núna akkúrrat núna þegar allt er byrjað, menn farnir að bora, grafa og sprengja í gegnum fjöllin, gera vegi og brýr þá vakna virkjunarandstæðingarnir, þá hrekkur eplið upp úr þeim, þeir taka andköf, erfitt að anda að sér súrefni þegar maður er búin að vera lengi í dái eins og Þyrnirós og erfitt að taka inn allt það sem er að gerast er búið að gerast og er að fara að gerast. Öskur ég öskra svo hátt að það verður hátíðni og enginn heyrir í mér.

Þetta svæði er ekki fyrir okkur það er fyrir komandi kynslóðir.

Afhverju skilja menn það ekki sem eru með virkjun?

Vilja þeir ekki hugsa um það að þeir eru að taka þátt í hryðjuverki gegn náttúrunni?

Vinna fyrir austan, peningar, stöðugleiki, koma í veg fyrir fólksflótta af landsbyggðinni,,,,,,,,

Er ég öfgasinni, væmin gella og náttúruverndarsinni??? Skilgreini mig ekki þannig, ég skilgreini mig sem einstakling sem er að berjast fyrir arfi komandi kynslóða jú og er nú líka smá stjórnleysingi.

Handritin okkar Íslendinga eru einstök og ómetnaleg, svo er hálendið einnig. Það er ómetanlegt og þar liggur vandinn. En ég brosi og læt sem ekkert sé því það gera töffarar.

Sunnudagur og engin þynnka!!! Jibbí, nú á sko að taka á því í ræktinni,borða sko já verð að muna að borða. Búin að fara í sund og synda í bestu lauginni í bænum, Vesturbæjarlauginni, það var snilld engin í lauginni klukkan 9 á sunnudagsmorgni.
Í gærkveldi hringdu strákarnir úr bústaðnum, voru að fara í pottinn og ég og Gummi maður fórum að rugla saman í símanum, verð að viðurkenna að gamli alkinn tók kipp, vildi út í bíl og austur fyrir fjall til þess eins að drekka alkóhól og bulla, en nei lét gamla alkann skríða upp í rúm með bók við hönd í stað glass við hönd, hann muldraði og vældi en nei kemur ekki til mála, við erum að fara að sofa sagði ég við gamla alkann og hann sætti sig við bók í stað bjórs.

Ætla að hitta hann Gumma í vikunni, doktor í líffræði hann Gummi næstum því en hugsar aðallega um það að vera fullur sem mest og sem lengst. Annars þá er Illugaskotta enn þá að bíða eftir vetrinum. Hugsa lítið þessa dagana er að komast í gang. Er að leita mér að jeppa, jörð, kalli, hesti, barni, hundi, hænum,,,,,,,,nei bara að bulla í ykkur. Farin til ömmu og svo þarf ég að hitta hann Iðunni vinkonu mína hef nú barasta ekkert séð hana síðan á seinasta ári.

Pælið í því næstu jól og áramót verð ég Illugskotta/ Björk Bjarnadóttir að læra á skíði og bretti í Aspen, U.S.A.!!!!

Vá laugardagsmorgun, ég komin í Tæknigarð til þess að gera sprengju!! nei ekki svo gott til þess að klára tossaverkefnið mikla sem vex mér í augum meira en allt annað. Sudda vinir mínir Gummi maður og co eru í hinni árlegu sumarbústaðaferð sem þýðir hið árlega ofur rugl og drykkja, mér er boðið. Sé til hve langt ég kemst í dag með verkefnið. Illugaskotta er flutt í hlíðarnar, það er frábært get núna labbað og hjólað allt sem ég þarf, en það er draugur í íbúðinni minni sem hagaði sér nú skikkanlega í nótt en ekki nóttina þar áður, þá var enginn svefnfriður.

Fór á Lord of the Rings með Einari vini mínum í gær, við vorum eins og séffar þarna í Lúxussal, í leður lötu strákum (lazy boy), fengum frían bjór með miðanum okkar. Dómar um myndina: hummm, já þetta er erfitt finnst mér, hún er ekki leiðinleg en svoldið út úr kortinu finnst mér, Gollum er ótrúlega flottur en gerður góður sem hann er alls ekki en vil ekki tjá mig mikið um þetta hérna, ,,,,,,bíð bara eftir mynd númer 3 og þá verður gaman því þar er svo mikið um að vera, mynd 2 er meira um baráttu, myrkur, þreytu og leiða þannig að ég skil að það hafi verið erfitt að útfæra hana. Farin á skrifstofuna!!! oj ömurlegt

Gleðilegt nýtt ár. Ég byrjaði árið með hvelli og mun líklega enda það með örðum eins hvelli, var uppi á fjalli að sprengja sprengjur, í Hvergisdal við Hvergisá. Sofnaði klukkan 11 því ég bara nennti ekki að bíða eftir áramótunum, ein þau klikkuðustu í heiminum þessi áramót það verð ég að segja. Kveðja til ykkar allra sem nennið að lesa rausið frá Illugaskottu, er alltaf að skoða jarðir á netinu og það er nokkrar álitlegar hér og þar um landið. En erfitt að velja, mjög erfitt, en ekki nóg af jörðum á óskastaðnum Ströndum.